Ayubu ajibu: Ukuu wa Mungu hauchunguziki

¹Ndipo Ayubu akajibu, na kusema,

²Jinsi ulivyomsaidia huyo asiye na uwezo![#Mit 25:11]

Jinsi ulivyouokoa mkono usio na nguvu!

³Jinsi ulivyomshauri huyo asiye na hekima![#1 Kor 2:4]

Na kutangaza ujuzi wa kweli kwa wingi!

⁴Je! Umetamka maneno kwa nani?

Kisha ni roho ya nani iliyotoka kwako?

⁵Hao waliokufa watetemesha

Chini ya maji na hao wakaamo humo.

⁶Kaburi li wazi mbele yake,[#Zab 139:8; Mit 15:11; Isa 14:9; Amo 9:2; Ebr 4:13]

Uharibifu nao hauna kifuniko.

⁷Yeye hutandaza kaskazi juu ya nafasi isiyo na kitu,[#Zab 24:1,2]

Na kuutundika ulimwengu pasipo kitu.

⁸Huyafunga maji ndani ya mawingu yake mazito;[#Mit 30:4]

Na hilo wingu halipasuki chini yake.

⁹Husitiri uso wa kiti chake cha enzi,

Na kulitandaza wingu lake juu yake.

¹⁰Amepiga duara kuwa ni mpaka juu ya uso wa maji,[#Yer 5:22]

Hata hapo mwanga na giza vinapopakana.

¹¹Nguzo za mbingu zatetemeka,

Na kustaajabu kwa kukemea kwake.

¹²Huichafua bahari kwa uwezo wake,[#Kut 14:21; Isa 51:15; Zab 29:10; 74:13]

Na kumtema Rahabu kwa akili zake.

¹³Hizo mbingu hupambwa kwa roho yake;[#Zab 33:6]

Mkono wake umemchoma nyoka aendaye mbio.

¹⁴Tazama, hivi ni viunga tu vya njia zake;

Na jinsi yalivyo madogo manong'ono tusikiayo katika habari zake!

Lakini ngurumo za uweza wake ni nani awezaye kuzielewa?