Bildadi anena: Ayubu astahili kutubu

¹Ndipo Bildadi huyo Mshuhi akajibu, na kusema,

²Wewe utanena maneno haya hadi lini?

Maneno ya kinywa chako yatakuwa kama upepo mkuu hadi lini?

³Je! Mungu hupotosha hukumu?[#Mwa 18:25; Kum 32:4; Ayu 34:12; Dan 9:14]

Au, huyo Mwenyezi hupotosha yaliyo ya haki?

⁴Kwamba watoto wako wamemfanyia dhambi,

Naye amewatia mkononi mwa kosa lao;

⁵Wewe ukimtafuta Mungu kwa bidii,

Na kumsihi huyo Mwenyezi;

⁶Ikiwa wewe u safi na mwelekevu;

Hakika yeye sasa angeamka kwa ajili yako,

Na kuyafanya makazi ya haki yako kufanikiwa.

⁷Tena ujapokuwa huo mwanzo wako ulikuwa ni mdogo,

Lakini mwisho wako ungeongezeka sana.

⁸Basi, uwaulize, tafadhali, vizazi vya zamani,[#Kum 4:32]

Ujitie kuyaangalia yale baba zao waliyoyatafuta;

⁹(Kwani sisi tu wa jana tu, wala hatujui neno,[#Mwa 47:9; Zab 39:5]

Kwa kuwa siku zetu duniani ni kivuli tu;)

¹⁰Je! Hawatakufunza wao, na kukueleza,

Na kutamka maneno yatokayo mioyoni mwao?

¹¹Je! Hayo mafunjo yamea pasipo matope

Na makangaga kumea pasipo maji?

¹²Yakiwa yangali mabichi bado, wala hayakukatwa,[#Zab 129:6; Yer 17:6; Yak 1:10,11; 1 Pet 1:24]

Hunyauka mbele ya majani mengine.

¹³Ndivyo ulivyo mwisho wa hao wamsahauo Mungu;[#Ayu 11:20; 18:14; Zab 112:10; Mit 10:28; Isa 33:14; Mt 24:51; Lk 12:1,2]

Na matumaini yake huyo mbaya huangamia;

¹⁴Uthabiti wake utavunjika,

Na matumaini yake huwa ni utando wa buibui.

¹⁵Ataitegemea nyumba yake, isisimame;[#Ayu 27:18]

Atashikamana nayo, isidumu.

¹⁶Yeye huwa mti mbichi mbele ya jua,

Nayo machipukizi yake huenea katika bustani yake.

¹⁷Mizizi yake huzongazonga chuguu,

Huangalia mahali penye mawe.

¹⁸Lakini, aking'olewa mahali pake,[#Ayu 7:10; Zab 37:36]

Ndipo patamkana, na kusema, Mimi sikukuona.

¹⁹Tazama, furaha ya njia yake ni hii,[#Zab 113:7]

Na wengine watachipuka kutoka katika nchi.

²⁰Tazama, Mungu hatamtupa mtu mkamilifu,[#Zab 37:24; 1 The 5:23,24]

Wala hatawathibitisha watendao uovu.

²¹Bado atakijaza kinywa chako kicheko,

Na midomo yako ataijaza shangwe.

²²Hao wakuchukiao watavikwa aibu;

Nayo hema yake mwovu haitakuwako tena.