KITABU CHA KWANZA

¹Mithali za Sulemani, mwana wa Daudi, mfalme wa Israeli.[#1 Fal 4:32]

Utangulizi

²Kujua hekima na adabu; kutambua maneno ya ufahamu;

³kufundishwa matendo ya busara, katika haki na hukumu na adili.[#Mit 2:1]

⁴Kuwapa wajinga werevu, na kijana maarifa na tahadhari;

⁵mwenye hekima asikie na kuongezewa elimu, na mwenye ufahamu ayafikie mashauri yenye njia.

⁶Kufahamu mithali na kitendawili, na maneno ya wenye hekima na mafumbo yao.

⁷Kumcha BWANA ni chanzo cha maarifa, Bali wapumbavu hudharau hekima na adabu.[#Ayu 28:28; Zab 111:10; Mit 9:10]

Maonyo juu ya kushirikiana na waovu

⁸Mwanangu, yasikilize mafundisho ya baba yako,

Wala usiiache sheria ya mama yako,

⁹Kwa maana hayo yatakuwa kilemba cha neema kichwani pako,

Na mikufu shingoni mwako.

¹⁰Mwanangu, wenye dhambi wakikushawishi,[#Mwa 39:7; Amu 16:16-21; Rum 16:18; Efe 5:11]

Wewe usikubali.

¹¹Wakisema, Haya! Njoo pamoja nasi,[#Mit 12:6; Yer 5:26; Mik 7:2]

Na tuvizie ili kumwaga damu;

Tumwotee asiye na hatia, bila sababu;

¹²Tuwameze hai kama kuzimu,[#Zab 28:1]

Na wazima, kama wao washukao shimoni.

¹³Tutapata mali yote ya thamani,

Tutazijaza nyumba zetu mateka.

¹⁴Wewe utashirikiana nasi;

Tutakuwa na vitu vyote kwa shirika.

¹⁵Mwanangu, usiende njiani pamoja nao;[#Mit 4:14]

Uzuie mguu wako usiende katika mapito yao.

¹⁶Maana miguu yao huenda mbio maovuni,[#Isa 59:7]

Nao hufanya haraka ili kumwaga damu.

¹⁷Kwa kuwa mtego hutegwa bure,

Mbele ya macho ya ndege yeyote.

¹⁸Na hao hujiotea damu yao wenyewe,

Hujinyemelea nafsi zao wenyewe.

¹⁹Ndivyo zilivyo njia za kila mwenye tamaa ya mali;[#2 Fal 5:20-27; Mik 2:1-3; 1 Tim 6:10]

Huuondoa uhai wao walio nayo.

Wito wa hekima

²⁰Hekima hulia kwa sauti katika njia kuu,[#Mit 8:1-3]

Hupaza sauti yake katika viwanja;

²¹Hulia penye mikutano mikubwa ya watu,

Mahali pa kuyaingilia malango,

Ndani ya mji hutamka maneno yake.

²²Enyi wajinga, hata lini mtapenda ujinga?

Na wenye dharau kupenda dharau yao,

Na wapumbavu kuchukia maarifa?

²³Geukeni kwa ajili ya maonyo yangu;[#Yoe 2:28; Yn 7:37]

Tazama, nitawamwagia roho yangu,

Na kuwajulisheni maneno yangu.

²⁴Kwa kuwa nimeita, nanyi mkakataa;[#Isa 66:4; Yer 7:13; Zek 7:11]

Nimeunyosha mkono wangu, wala hakuna aliyeangalia;

²⁵Bali mmeupuuza ushauri wangu,[#Lk 7:30]

Wala hamkutaka maonyo yangu;

²⁶Mimi nami nitacheka siku ya msiba wenu,

Nitadhihaki hofu yenu ifikapo;

²⁷Hofu yenu ifikapo kama tufani,

Na msiba wenu ufikapo kama kisulisuli,

Dhiki na taabu zitakapowafikia.

²⁸Ndipo watakaponiita, lakini sitaitika;[#Isa 1:15; Yer 14:12; Mik 3:4; Yak 4:3]

Watanitafuta kwa bidii, wasinione.

²⁹Kwa kuwa walichukia maarifa,[#Ayu 21:14; Zab 50:16,17; Isa 27:11; Yn 3:20; Mdo 7:51]

Wala hawakuchagua kumcha BWANA.

³⁰Hawakukubali mashauri yangu,

Wakayadharau maonyo yangu yote.

³¹Kwa hiyo watakula matunda ya njia yao,[#Isa 3:11]

Watashiba mashauri yao wenyewe.

³²Maana kurudi nyuma kwao wajinga kutawaua,

Na kufanikiwa kwao wapumbavu kutawaangamiza.

³³Bali kila anisikilizaye atakaa salama,

Naye atatulia bila kuogopa mabaya.