Agano la Mungu wa Daudi

¹Fadhili za BWANA nitaziimba milele;

Kwa kinywa changu nitavijulisha vizazi vyote uaminifu wako.

²Maana nimesema, Fadhili zitajengwa milele;

Katika mbingu utauthibitisha uaminifu wako.

³Nimefanya agano na mteule wangu,[#Eze 34:23; Hes 3:5; Mdo 2:30; Ebr 7:21]

Nimemuapia Daudi, mtumishi wangu.

⁴Wazao wako nitawaimarisha milele,[#2 Sam 7:12-16; 1 Fal 9:5; 1 Nya 17:11-14; Isa 9:6,7; Lk 1:32; Zab 132:11; Mdo 2:30; Rum 1:3]

Nitakijenga kiti chako cha enzi hata milele.

⁵Ee BWANA, mbingu zitayasifu maajabu yako,

Uaminifu wako katika kusanyiko la watakatifu.

⁶Maana ni nani katika mbingu awezaye kulinganishwa na BWANA?

Ni nani afananaye na BWANA miongoni mwa malaika?

⁷Mungu huogopwa sana barazani pa watakatifu,

Ni wa kuhofiwa kuliko wote wanaomzunguka.

⁸BWANA, Mungu wa majeshi,

Ni nani aliye hodari kama Wewe, Ee YAHU?

Na uaminifu wako unakuzunguka.

⁹Wewe ndiwe ukitawalaye kiburi cha bahari.[#Ayu 38:11; Nah 1:4; Mt 8:26]

Mawimbi yake yainukapo, wewe unayatuliza.

¹⁰Ndiwe uliyemponda Rahabu akawa kama aliyeuawa,[#Isa 30:7; #89:10 Iliaminika Rahabu ni aina ya joka la baharini lenye kuleta ghasia na maovu.]

Kwa mkono hodari umewatawanya wakuchukiao.

¹¹Mbingu ni mali yako, nchi nayo ni mali yako,

Ulimwengu na vyote viujazavyo

Ndiwe uliyeupiga msingi wake.

¹²Kaskazini na kusini ndiwe uliyeziumba,[#Yos 19:22; 12:1; Amu 4:6]

Tabori na Hermoni hulifurahia jina lako.

¹³Mkono wako ni mkono wenye uweza,

Mkono wako una nguvu,

Mkono wako wa kulia umetukuka.

¹⁴Haki na hukumu ndio msingi wa kiti chako,

Fadhili na kweli zimo mbele za uso wako.

¹⁵Heri watu wale waijuao sauti ya shangwe,[#Hes 10:10]

Ee BWANA, waendao, katika nuru ya uso wako.

¹⁶Kwa jina lako hufurahi mchana kutwa,

Na kwa haki yako hutukuzwa.

¹⁷Maana fahari ya nguvu zao ni Wewe,

Na kwa radhi yako pembe yetu itatukuka.

¹⁸Maana ngao yetu ni BWANA,[#Hos 13:10]

Na mfalme wetu ni wake Mtakatifu wa Israeli.

¹⁹Ndipo ulipowaambia watakatifu wako kwa maono,

Ukasema, Nimempa aliye hodari msaada;

Nimemtukuza aliyechaguliwa miongoni mwa watu.

²⁰Nimemwona Daudi, mtumishi wangu,[#1 Sam 13:14; 16:12; Mdo 13:22]

Nimempaka mafuta yangu matakatifu.

²¹Ambaye mkono wangu utakuwa thabiti kwake,

Na mkono wangu utamtia nguvu.

²²Adui hatamwonea,

Wala mwana wa uovu hatamtesa.

²³Bali nitawaponda watesi wake mbele yake,

Nitawapiga wanaomchukia.

²⁴Uaminifu wangu na fadhili zangu atakuwa nazo,[#Zab 61:7]

Na kwa jina langu pembe yake itatukuka.

²⁵Nitaweka mkono wake juu ya bahari,

Na mkono wake wa kulia juu ya mito.

²⁶Yeye ataniita, Wewe ni baba yangu,[#2 Sam 7:14; 1 Nya 22:10; Yn 5:17]

Mungu wangu na mwamba wa wokovu wangu.

²⁷Nami nitamjalia kuwa mzaliwa wangu wa kwanza,[#Zab 2:7; Ufu 1:5]

Kuwa juu sana kuliko wafalme wote wa dunia.

²⁸Hata milele nitamwekea fadhili zangu,

Na agano langu naye litadumu hata milele.

²⁹Wazao wake nao nitawadumisha milele,[#Isa 9:7; Yer 33:17; Dan 7:14; Kum 11:21]

Na kiti chake cha enzi kama siku za mbingu.

³⁰Wanawe wakiiacha sheria yangu,[#2 Sam 7:14; Yer 9:13]

Wasiende katika hukumu zangu,

³¹Wakizivunja amri zangu,

Wasiyashike maagizo yangu,

³²Basi, nitawarudi makosa yao kwa fimbo,

Na uovu wao kwa mapigo.

³³Lakini fadhili zangu sitamwondolea yeye,

Wala sitafanya uaminifu wangu kuwa uongo.

³⁴Mimi sitalivunja agano langu,

Sitalibadili neno lililotoka midomoni mwangu.

³⁵Neno moja nimeliapa kwa utakatifu wangu,[#Zab 110:4; Ebr 6:13,17; Amo 4:2; 8:7]

Hakika sitamwambia Daudi uongo,

³⁶Wazawa wake watadumu milele,[#2 Sam 7:16; Lk 1:33; Yn 12:34]

Na kiti chake cha enzi kuwa mbele yangu kama jua.

³⁷Kitathibitika milele kama mwezi;[#Yer 31:35]

Shahidi mwaminifu aliye mbinguni.

³⁸Lakini wewe umemtupa na kumkataa,

Umemghadhibikia masihi wako.

³⁹Umechukizwa na agano la mtumishi wako,[#Omb 5:16]

Umelinajisi taji lake na kulitupa chini.

⁴⁰Umeyabomoa maboma yake yote,

Umezifanya ngome zake kuwa magofu.

⁴¹Wote wapitao njiani wanateka mali zake;

Amedharauliwa na jirani zake;

⁴²Umeutukuza mkono wa kulia wa watesi wake;

Umewafurahisha wote wanaomchukia.

⁴³Pia umeurudisha nyuma ukali wa upanga wake;

Wala hukumsimamisha vitani.

⁴⁴Umeikomesha fahari yake;

Kiti chake cha enzi umekitupa chini.

⁴⁵Umezipunguza siku za ujana wake;

Umemvika aibu.

⁴⁶Hadi lini, Ee BWANA? Utajificha hata milele?

Ghadhabu yako itawaka kama moto hadi lini?

⁴⁷Ukumbuke jinsi mimi nisivyo wa kudumu;[#Ayu 7:7]

Kwa ubatili gani umeiumba jamii ya wanadamu!

⁴⁸Ni mwanamume gani atakayeishi asione mauti,[#Ebr 11:5]

Atakayejiokoa nafsi yake na mkono wa kuzimu?

⁴⁹Bwana, ziko wapi fadhili zako za kwanza,[#2 Sam 7:15; Isa 55:3]

Ulizomwapia Daudi kwa uaminifu wako?

⁵⁰Ukumbuke, Ee Bwana,

Wanavyosimangwa watumishi wako;

Jinsi ninavyostahimili kifuani mwangu

Masimango ya watu wengi.

⁵¹Ambayo adui zako wamesimanga, Ee BWANA,

Naam, wamezisimanga hatua za masihi wako.

* * *

⁵²Na ahimidiwe BWANA milele. Amina na Amina.