¹Kwa maana amchaye BWANA atayafanya hayo, naye aishikaye torati atapata hekima.

²Naye Hekima atakutana naye kama mama, na mfano wa mke aliye mwanamwali.

³Atamlisha mkate wa ufahamu, atamnywesha maji ya utambuzi.

⁴Huyo naye atathibitishwa juu yake asitikisike, na kumtegemea asifadhaike.

⁵Naye Hekima atamtukuza kupita jirani zake, na kumfumbulia kinywa chake katikati ya kusanyiko.

⁶Huyo ataona furaha na shangwe, na kurithishwa jina la milele.

⁷Bali wapumbavu hawatampata, wala wakosaji hawatamwona;

⁸yu mbali na watu wa dhihaka, wala wasemao uongo hawamkumbuki.

⁹Kinywani mwa mwenye dhambi himidi hazifai, madhali hakupewa na BWANA.

¹⁰Kinywani mwa mwenye hekima himidi hutolewa, naye mtu aliyehitimu hekima atajifunza kuhimidi.

Uhuru wa Kuchagua

¹¹Usiseme, Ni juu ya BWANA nilivyoasi;[#Sira 17:1-12]

Maana usitende yanayomchukiza.

¹²Usiseme, Ndiye aliyenikosesha;

Maana hana haja ya mkosaji.

¹³BWANA hukirihi kila linalochukiza;

Wala wamchao hawalipendi hilo.

¹⁴Hapo mwanzo Mungu alimuumba mwanadamu,

Akamwacha aifuate nia yake.

¹⁵Ukipenda, utazishika amri zake,

Na kutenda amini ni shauri lako.

¹⁶Ameweka mbele yako moto na maji;

utanyosha mkono wako uchaguavyo.

¹⁷Mbele ya mwanadamu upo uzima na mauti,

Naye atapewa apendavyo.

¹⁸Mradi hekima ya BWANA yatosha,

Mkuu mwenye uweza hutazama vyote,

¹⁹Macho yake ni juu yao wamchao,

Naye atapeleleza kila kazi ya watu.

²⁰Hakumwamuru mtu yeyote awe asi,

Wala humruhusu atende dhambi.