Ukuu wa Mungu

¹Yeye anayeishi milele ameviumba vitu vyote pia.

²BWANA peke yake atahesabiwa

³kuwa ni haki,

⁴Hakumjalia mtu yeyote kuzieleza kazi zake; naye ni nani awezaye kuyakagua matendo yake makuu?

⁵Nani atakayeuhubiri uweza wa adhama yake? Naye ni nani atakayeitangaza jumla ya rehema zake?

⁶Haiwezekani kuyapunguza wala kuyaongeza, wala kuyachunguza mambo ya ajabu ya BWANA.

⁷Hata mtu atakapokwisha, huwa ndio mwanzo tu; naye pale atakapokoma ndipo atakapoingiwa na shaka.

Mtu si Kitu

⁸Mwanadamu ni kitu gani, anafaa wapi?

Jema lake lipi, na baya lake lipi?

⁹Jumla ya siku zake haizidi miaka mia;

¹⁰Kama tone la maji litokalo baharini,

Mfano wa mbwe iliyookotwa ufuoni,

Ndiyo miaka haba katika umilele.

¹¹Kwa sababu hiyo BWANA alikuwa mvumilivu kwao, akawakirimia wingi wa rehema zake.

¹²Aliona akaufuahamu mwisho wao, ya kuwa ni mbaya; kwa hiyo akawaongezea masamaha yake.

¹³Rehema ya mwanadamu huwa juu ya jirani yake, bali rehema za BWANA zi juu ya wote wenye mwili. Huwakemea na kuwaelemisha na kuwafundisha, huwarudisha mfano wa mchungaji na kondoo zake.

¹⁴Huwarehemu wale wakubalio kuelimishwa, wazitafutao hukumu zake kwa bidii.

Moyo Safi katika kutoa Sadaka

¹⁵Katika fadhili zako usitie hitilafu,

Wala kijicho katika upaji wako.

¹⁶Umande hupunguza joto ya kaskazi,

Nalo neno huwa zuri kuliko zawadi,

¹⁷Neno la hisani laongeza zawadi,

Na yote mawili yana mtu wa fadhili.

¹⁸Mpumbavu atashutumu bila ustahivu,

Na kipawa cha bahili hushusha macho.

Haja ya Kuakisi na Kujitawala

¹⁹Mwanangu, ujifunze elimu kabla ya kunena, ujitunze afya yako kabla ya kuugua.

²⁰Kabla hujahukumiwa ujihakikishe roho yako, nawe utaona masamaha wakati wa kujiliwa.

²¹Ujinyenyekeshe kabla ya kuugua, na endapo umetenda dhambi onesha toba.

²²Neno lolote lisikuzuie hata usiiondoe nadhiri yako kwa majira yake, wala usingoje wewe mpaka kufa kuhesabiwa kuwa una haki.

²³Kabla ya kuweka nadhiri ujiweke tayari, wala usiwe kama mtu amjaribuye Mungu.

²⁴Uitafakari ghadhabu ya siku za mwisho, na wakati wa kisasi atakapogeuzia mbali uso wake.

²⁵Wakati wa shibe kumbuka wakati wa njaa, na siku za utajiri fikiri umaskini na uhitaji.

²⁶Tangu asubuhi hata jioni na wakati umebadilika, na mambo yote yanakwenda kasi mbele za BWANA.

²⁷Mwenye hekima hutanadhari katika yote, na panapo nafasi ya kutenda dhambi atajihadhari na matatizo.

²⁸Kila mtu wa ufahamu hutambua hekima, naye atamshukuru yeye aliyeivumbua.

²⁹Pia wale waliokuwa welekevu wa maneno walionekana wenyewe kuwa wataalamu, wakakupua mithali za kufaa.

Kiasi

³⁰Usizifuate tamaa za roho yako,

Bali ujizuilie uchu wake.

³¹Endapo utaipa roho yako ruhusa ya kuziridhisha tamaa zake kwa wingi, itakufanya mzaha kwa adui zako.

³²Usichangamke katika wingi wa anasa,

Usije ukapata umaskini maradufu.

³³Usifilisike kwa kula karamu za makope, maadamu huna kitu cha mali mfukoni mwako.