Dhambi Mbalimbali

¹Mwanangu, umetenda dhambi? Usizidi;

Tena omba dua kwa dhambi za kale.

²Uikimbie dhambi kama mbele ya uso wa nyoka; mradi itakuuma ukikaribia; meno yake ni kama meno ya simba; inazifisha roho za watu.

³Udhalimu wote ni upanga ukatao kuwili;

Ukipigwa nao hakuna kupona.

⁴Tisho na ukatili huangamiza makao;

Hivyo nyumba ya mwenye kiburi itafanywa gofu.

⁵Mungu husikia dua ya maskini,[#Sira 35:17-19]

Tena hukumu yake haikawii kufika.

⁶Mchukia kemeo yupo njiani pa mkosaji;

Bali amchaye BWANA atageuka moyoni.

⁷Mtaalamu humtambua aliye mbele yake,

Na kumchunguza mwenye dhambi mara.

⁸Aijengaye nyumba kwa mali za watu,

Ni kama akusanyaye mawe kwa kaburi.

⁹Makusanyiko ya wadhalimu ni kama kitani iliyofungamana; na mwisho wake ni moto wa miali.

¹⁰Njia ya wenye dhambi imelainika haina mawe; na mwisho wake ni shimo la Jehanamu!

Hekima na Upumbavu

¹¹Mwenye kuishika torati hupata kutawala tamaa;

Na mwisho wa kumcha BWANA ndio hekima.

¹²Asiye mwerevu hatapata kuelimishwa;

Bali upo werevu uongezao uchungu tele.

¹³Maarifa ya mwenye hekima yatajaa kama kisima;

Na shauri lake kama chemchemi ya uzima.

¹⁴Mtima wa mpumbavu ni chombo kilichovunjika:

Hataweza kuchukua maarifa maisha yake.

¹⁵Mtu wa maarifa akisikia neno la hekima,

Atalitukuza, pia na kuliongeza.

Mtu mpotovu hulisikia na kudhihaki,

Na kulitupa nyuma ya mgongo wake.

¹⁶Mazungumzo ya mpumbavu ni mzigo njiani;

Bali neema imo midomoni mwa wataalamu.

¹⁷Kinywa cha mwekevu kitatafutwa kwenye mkutano;

Nao watatafakari maneno yake mioyoni mwao.

¹⁸Hekima kwa mpumbavu hufanana na magofu;

Na maarifa ya mjinga ni maneno pasipo maana.

¹⁹Mafundisho ni pingu miguuni pa mjinga,

Naam, pingu katika mkono wake wa kuume.

²⁰Mpumbavu hupaaza sauti yake katika kucheka;

Bali mwerevu aona shida hata ya kuchekelea.

²¹Mafundisho ni pambo la dhahabu kwa mwelekevu,

Naam, vikuku katika mkono wake wa kuume.

²²Mguu wa mjinga mno upesi nyumbani mwa mtu;

Bali mwelekevu atasita katika kuingia.

²³Mpumbavu atachungulia mlangoni pa nyumba;

Bali mwenye adabu husimama nje.

²⁴Ni kukosa adabu ya mtu kusikiliza mlangoni; lakini mtu wa busara angeona haya kutenda hivi.

²⁵Midomo ya wenye kiburi ni mizito ya kulaani; bali maneno ya wenye busara yapimwa katika mizani.

²⁶Moyo wa mpumbavu u kinywani mwake; bali kinywa cha mwenye hekima ni moyo wake.

²⁷Mwovu anapomlaani yule mwovu

Huilaani roho yake mwenyewe.

²⁸Msingiziaji huinajisi roho yake.

Atachukiwa popote akaapo.