¹Yaani, sifa mbaya itarithi aibu na lawama, kwa mfano wa mkosefu aliye mnafiki.

²Tena usione fahari juu ya nguvu za tamaa yake, isije ikaharibu nguvu zako kama fahali.

³Maadamu inakula majani yako, na kuyaharibu matunda yako, na kukuacha wewe mwenyewe mti mkavu.

⁴Roho ya ufisadi itamharibu yeye aliye nayo, hata kumfanya mzaha kwa adui zake.

Urafiki, Uongo na Kweli

⁵Maneno matamu yatamzidishia mtu rafiki, na midomo yenye neema itamwongezea wamsalimuo.

⁶Wale wenye amani nawe na wawe wengi; bali washauri wako mmoja katika elfu.

⁷Ukitaka kujipatia rafiki, umpate kwa kumjaribu, wala usiwe na haraka katika kumwamini;

⁸yaani, kuna rafiki wakati wa kufaa, ambaye yeye hatadumu wakati wa msiba wako.

⁹Tena kuna rafiki ageukaye kuwa adui, naye atakukashifia fitina iletayo lawama.

¹⁰Pia kuna rafiki tena, ambaye anakula mezani pako, bali siku ya mabaya haonekani;

¹¹wakati wa kufanikiwa kwako atakuwa sawa nawe, na kupiga domo juu ya watumishi wako;

¹²lakini ukipatwa na masaibu atakugeuka, na kujificha mbali nawe na uso wako.

¹³Basi ujitenge na adui zako; tena ujihadhari na rafiki zako.

¹⁴Walakini rafiki aliye amini ndiye ngome; naye aliyempata amepata tunu.

¹⁵Hakuna badala ya rafiki amini, wala uzuri wake hauna bei.

¹⁶Rafiki amini ni kufunga uzima; naye amchaye Mungu atampata.

¹⁷Mcha Mungu hunyosha urafiki wake, kwa maana alivyo yeye mwenyewe ndivyo alivyo na jirani yake.

Baraka za Hekima

¹⁸Mwanangu, uchume maarifa tangu ujana hata kuwa mwenye mvi, nawe utapata hekima.

¹⁹Uijilie kama alimaye na kupanda, uyasubiri matunda yake mazuri; maana kazi yako ya ulimaji itakuwa haba nawe utakula matunda yake mara.[#Yak 5:7-8]

²⁰Ni ajabu ilivyoparuza njia yake kwake asiyefundishwa, wala asiye na ufahamu hatakaa ndani yake;

²¹kama jiwe zito lemevu itakuwa juu yake, wala hatakawia kuitupa.

²²Yaani, hekima ni sawasawa na jina lake, wala haikufunuliwa kwa watu wengi.

²³Mwanangu, tega sikio uikubali hukumu yangu, wala usilikatae shauri langu.

²⁴Uitie miguu yako katika pingu zake, pia na shingo yako katika minyororo yake;

²⁵weka bega lako chini uichukue nira yake; wala usione uchungu kwa vifungo vyake.

²⁶Uijilie kwa roho yako yote, uzishike njia zake kwa nguvu zako zote.

²⁷Kutafuta uitafute nayo itadhihirika kwako; wala usiiache ukiisha kuipata.

²⁸Kwa maana mwishowe utaiona raha yake, nayo itakugeukia changamko;

²⁹pingu zake zitakuwia kifuniko cha nguvu, na minyororo yake vazi la utukufu.

³⁰Kwa maana nira yake ni pambo la dhahabu, na vifungo vyake ni nyuzi za samawi;

³¹utaivaa kama vazi la utukufu, na kama taji la uzuri utajivika nayo.

³²Mwanangu, ukitaka utafahamishwa; ukitia moyo wako utakuwa mwerevu;

³³ukipenda kusikia utapokea ukitega sikio lako utapata kuwa na hekima.

³⁴Usimame, basi, katika mkutano wa wakuu na yeyote aliye na hekima uambatane naye.

³⁵Uwe tayari kusikiliza kila hotuba ya utauwa, wala usipitiwe na mithali za ufahamu.

³⁶Umwonapo mtaalamu umwendee mapema, hata kwa miguu yako uyachakaze madaraja ya mlango wake.

³⁷Moyo wako uyafikiri maagizo ya BWANA, uzitafakari daima amri zake; naye atakufundisha moyo wako, na tamaa yako ya hekima utapewa.[#Yos 1:8; Zab 1:2]