Baraka na Akili

¹Usishindane na mkuu, usije ukaanguka mikononi mwake;

²usipingane na tajiri, asije akakuweza kama labda itakavyotukia; kwa maana dhahabu imewaharibu wengi, na kuipotosha mioyo ya wafalme.

³Usijadiliane na mtu mwenye maneno mengi, ukaongeza kuni juu ya moto wake;

⁴wala usibishane na mfidhuli, wazee wako wasipate kutukanwa.

⁵Usimshutumu mtu akiiacha dhambi yake; kumbuka ya kwamba sisi sote tunastahili adhabu.

⁶Usimdharau mtu katika uzee wake, mradi miongoni mwetu wengine tunazeeka;

⁷pia usisimange juu yake aliyefariki; kumbuka ya kwamba miongoni mwetu sisi sote tunakufa.

Mapokeo

⁸Usijitenge na mazungumzo ya wenye hekima, bali ujizoeze na mithali zao; yaani, kwa hizo utajifunza elimu, na jinsi ya kusimama mbele ya wakuu.

⁹Usikatae maongezi ya wazee, ambao walijifunza kwa baba zao; maana kwa hayo utapata ufahamu, na kutoa jawabu ikiwapo haja.

Busara

¹⁰Usichochee makaa ya mkosaji, usije ukaungua katika mwako wa moto wake.

¹¹Usijiinue mbele ya mwenye jeuri, asije akayavizia maneno ya kinywa chako.

¹²Usimkopeshe yeye aliye mkuu kuliko wewe; la! Umemkopesha, ujifanye kama mtu aliyepoteza.

¹³Usiwe mdhamini kupita kadiri yako la! Umedhamini, ujifikiri kama aliyeshurutishwa kulipa.

¹⁴Usishitakiane na hakimu; kwa sababu minajili heshima yake atapewa haki.

¹⁵Usiende njiani pamoja na jabari, asije akauonea uchungu; huyo atafanya kama apendavyo, nawe utapotea katika ujinga wake.

¹⁶Usipigane na mtu wa ghadhabu, wala usisafiri naye jangwani; kwa kuwa damu si kitu kwake, na pasipopatikana msaidizi atakuangamiza.

¹⁷Usishauriane na mpumbavu, ambaye hataweza kuficha siri yako;

¹⁸usifanye jambo la siri mbele ya mgeni, mradi hujui atakalofanyiza;

¹⁹wala usiufunue moyo wako kwa kila mtu; wala usimwache mtu akulipe fadhili.