SUSANA

Uzuri wa Susana waponza waamuzi

¹Palikuwa na mtu, jina lake Yoakimu, akikaa Babeli,

²naye ameoa mke jina lake Susana binti Hilkia, mwanamke mzuri sana na mcha Mungu.

³Wazee wake nao walikuwa wenye haki, pia wamemfundisha binti yao sawasawa na Torati ya Musa.

⁴Basi Yoakimu alikuwa muungwana tajiri, na karibu na nyumba yake alikuwa na bustani nzuri; hivyo Wayahudi humwendea, maana alikuwa mwenye heshima kupita wengineo wote.

⁵Mwaka ule ule wakaamriwa wawili miongoni mwa wazee wa watu ili kuamua, watu wa namna ile ambao BWANA aliwanena, kama ufisadi ulitoka Babeli kwa wazee waamuzi waliohesabiwa kuwa wanatawala watu.

⁶Hao walikuwa wakienda mara nyingi kuzuru kwenye nyumba yake Yoakimu; na wote wenye mashtaka yoyote desturi yao wakawajia huko.

⁷Basi watu walipoondoka kwenda zao panapo saa sita, Susana huingia katika bustani ya mumewe ili kutembea.

⁸Nao wale wazee wawili humwona kila siku anakwenda kutembea; hata wakawaka tamaa kwa sababu yake.

⁹Ndipo walipozipotosha nia zao, wakayageuza upande macho yao, wasiweze kutazama mbinguni wala kukumbuka hukumu za haki.

¹⁰Na ingawa wote wawili walichomwa kwa kumtamani, lakini hawakuthubutu kujulishana taabu zao;

¹¹mradi waliona haya kuzidhihirisha tamaa zao mbaya, walivyotamani kumpata.

¹²Lakini siku kwa siku wakachungulia kwa husuda ili wamwone,

¹³hata mmoja wao akamwambia mwenzake, Twende zetu nyumbani, maana ni saa ya chakula. Nao walipotoka wakaachana,

¹⁴walirudi nyuma tena kila mtu, wakafika pale pale; ndipo walipoulizana sababu wakakiri tamaa zao, nao wote wawili walijiwekea wakati watakapoweza kumpata yu peke yake.

Waamuzi wajaribu kumbaka Susana

¹⁵Ikawa, walipongoja wakati wa kufaa, yeye aliingia bustanini kama ilivyokuwa desturi yake pamoja na wajakazi wawili, naye alitaka kuoga kwa sababu kulikuwa na joto.

¹⁶Wala hapo hapakuwa na mtu yeyote isipokuwa wale wazee wawili, ambao wamejificha wakimvizia.

¹⁷Basi akawaambia wajakazi wake, Nileteeni mafuta na sabuni, mkaifunge milango ya bustani, ili nioge.

¹⁸Wakafanya kama vile alivyowaagiza, wakaifunga milango ya bustani, wakatoka wenyewe kwa milango ya nyuma ili kuvileta vile vitu alivyoviagiza; wala hawakuwaona wale wazee, kwa maana wamejificha.

¹⁹Mara, wale wajakazi walipokwisha kutoka, wale wazee wawili waliondoka wakamwendea mbio, wakasema,

²⁰Tazama, milango ya bustani imefungwa asiweze kutuona mtu yeyote, nasi tunakupenda sana; haya! Basi, utukubali ulale nasi.

²¹La! Hutaki; tutakushuhudia ya kuwa hapa palikuwapo kijana pamoja nawe, ndiyo sababu uliwaruhusu wajakazi wako.

²²Basi Susana aliugua, akasema, Nimesongwa pande zote; maana nikilitenda hilo ni mauti yangu; nisipolitenda siwezi kuokoka mikononi mwenu.[#Law 20:10; Kum 22:22]

²³Ni afadhali nianguke katika mikono yenu na kukataa, kuliko kutenda dhambi machoni pa Mungu.

²⁴Mara Susana akapiga kelele kwa sauti kuu; nao wale wazee wawili wakampigia kelele pia.

²⁵Kisha mmoja wao akakimbia, akaifungua milango ya bustani.

²⁶Hivyo watumishi wa nyumbani waliposikia kelele bustanini, wao waliingia kwa kasi kwa mlango wa nyuma ili waone ni nini iliyompata.

²⁷Lakini wale wazee waliisimulia hadithi yao nao watumishi wakaona aibu kabisa; kwa maana Susana hakuchongelewa habari ya namna hiyo wakati wowote.

Ushahidi wa uongo juu ya Susana

²⁸Ikawa, kesho yake, watu walipokusanyika kwa Yoakimu mumewe, wale wazee wawili wakaja nao, wamejaa kusudi lao ovu juu ya Susana la kumfisha;

²⁹wakasema mbele ya watu, Mwiteni Susana binti Hilkia, mkewe Yoakimu aje hapa.

³⁰Basi akaenda kuitwa; naye akaja pamoja na baba yake na mama yake, na watoto wake, na jamaa zake wote.

³¹Naye huyo Susana alikuwa mwanamke mwenye adabu, mzuri wa uso;

³²basi hao watu wabaya waliamuru afunuliwe uso, maana alifunikwa utaji, ili washibe uzuri wake.

³³Kwa hiyo rafiki zake na wote waliomtazama wakasikitika.

³⁴Ndipo wale wazee wawili waliposimama katikati ya watu, wakaweka mikono yao juu ya kichwa chake.

³⁵Naye akatoka machozi, akatazama juu mbinguni; kwa maana moyo wake alimtumaini Mungu.

³⁶Wale wazee wakasema, Sisi tulipokuwa tukitembea bustanini peke yetu, huyu aliingia pamoja na wajakazi wawili, wakaifunga milango ya bustani, naye mara akawaruhusu wajakazi.

³⁷Kisha, kukatokea kijana, ambaye amejificha humo, akamwendea akalala naye.

³⁸Lakini sisi, tungaliko pembeni mwa bustani, tuliuona ubaya huo, tukawaendea mbio.

³⁹Hata tukiwa tumewaona pamoja, yule kijana hatukuweza kumkamata; maana alikuwa mwenye nguvu kuliko sisi, akaifungua milango akatoroka.

⁴⁰Bali huyu tulimkamata, tukauliza yule kijana yu nani,

⁴¹asikubali kutuambia. Hayo, basi, tunashuhudia. Basi, waliohudhuria wakawasadiki, wakiwa wazee wa watu na waamuzi; hivyo wakahukumu auawe.

⁴²Mara Susana akalia kwa sauti kuu, akasema, Ee Mungu wa milele, Wewe wajua yaliyositirika, wajua mambo yote yasijekuwako.

⁴³Wewe wajua ya kwamba wananishuhudia uongo, na, tazama, imenipasa kufa; lakini sikufanya kamwe mambo kama hayo, ambayo watu hawa wameyabuni juu yangu kwa ukorofi.

⁴⁴Naye BWANA akaisikia sauti yake.

⁴⁵Kwa hiyo, alipochukuliwa huyo kwenda kuuawa, Mungu alimchocheleza roho kijana mmoja, jina lake Danieli;

⁴⁶naye akapaza sauti akasema, Mimi simo; mimi sina hatia kwa habari ya damu yake mwanamke huyu.

⁴⁷Mara wote wakamgeukia, wakasema, Maneno hayo uyasemayo, maana yake nini?

Danieli amwokoa Susana

⁴⁸Akasimama katikati, akasema, Enyi wana wa Israeli, mmekuwa wapumbavu, hata kumhukumu binti Israeli bila kuhoji wala kupata hakika ya kweli?

⁴⁹Rudini hukumuni; mradi hao wanamshuhudia uongo.

⁵⁰Basi watu wote walirejea kwa haraka, nao wale wazee wakamwambia, Njoo uketi kati yetu, utujulishe habari hiyo, endapo Mungu amekupa wewe heshima ya mzee.

⁵¹Hapo Danieli aliwaambia, Watu hawa wawili watengwe, nami nitawahoji.

⁵²Basi wakiisha kutengwa, akamwita mmoja wao akamwambia, Ewe uliyepata kuwa mzee katika uovu, sasa dhambi zako zimekukalia, ulizozitenda zamani

⁵³kwa kuhukumu isivyo haki, kumpatiliza asiye na hatia na kumwachilia mwovu; lakini BWANA asema, asiye na hatia, mwenye haki, usimwue.[#Kut 23:7]

⁵⁴Haya! Basi, wewe ulimwona kwa macho; useme; Chini ya mti gani ulipowaona wakikaa pamoja? Naye akajibu, Chini ya msandarusi.

⁵⁵Danieli akasema, Hakika umesema uongo juu ya kichwa chako mwenyewe; maana sasa hivi malaika wa Mungu amepokea hukumu ya Mungu, akukate vipande viwili.

⁵⁶Akamtenga huyo tena, akaamuru kumleta yule mwingine, akamwambia, Ewe mzao wa Kanaani, wala si wa Yuda, uzuri umekudanganya, na tamaa imeupotosha moyo wako.

⁵⁷Hivyo ndivyo ulivyowafanyia binti za Israeli, na kwa hofu walitembea nawe; bali huyu binti Yuda hakuweza kuustahimili uovu wako.

⁵⁸Haya! Basi, nawe useme; Chini ya mti gani ulipowaona wakikaa pamoja? Naye akajibu, Chini ya mkwaju.

⁵⁹Danieli akamwambia, Hakika wewe nawe umesema uongo juu ya kichwa chako mwenyewe; maana malaika wa Mungu yu tayari, anakungoja mwenye upanga, akukate vipande viwili; ili awaangamize nyote wawili.

⁶⁰Mara hiyo makusanyiko yote wakapaza sauti kwa nguvu, wakamhimidi Mungu awakoaye wamtumainio.

⁶¹Wakawaondokea wale wazee wawili, kwa maana Danieli ameuhakikisha ushuhuda wao wa uongo hata vinywani mwao wenyewe.

⁶²Wakawatenda kwa Torati ya Musa kama vile walivyokusudia kwa ukorofi kumfanyia jirani yao; wakawaua; na mwenye damu isiyo na hatia aliokolewa siku ile.[#Kum 19:16-21]

⁶³Kwa hiyo Hilkia na mkewe walimhimidi Mungu kwa ajili ya binti yao Susana, pamoja naye mumewe Yoakimu, na jamaa zao wote; madhali neno la aibu halikuonekana kwake.

⁶⁴Na tokeapo Danieli alipata sifa kuu machoni pa watu.