Utawala wa Mungu juu ya Mataifa

¹Enyi watu wote, pigeni makofi,

Mpigieni Mungu kelele kwa Sauti ya shangwe.

²Kwa kuwa BWANA Aliye juu, mwenye kuogofya,[#Kum 7:21; Neh 1:5; Mal 1:14]

Ndiye mfalme mkuu juu ya dunia yote.

³Atawatiisha watu wa nchi chini yetu,[#Zab 18:47]

Na mataifa chini ya miguu yetu.

⁴Atatuchagulia urithi wetu,[#1 Pet 1:4]

Fahari ya Yakobo ambaye alimpenda.

⁵Mungu amepaa kwa kelele za shangwe,[#Zab 24:7-10; Mdo 1:9; Efe 4:8-10; 1 Tim 3:16]

BWANA kwa sauti ya baragumu.

⁶Mwimbieni Mungu, naam, imbeni;

Mwimbieni mfalme wetu, naam, imbeni.

⁷Maana Mungu ndiye mfalme wa dunia yote,[#Zek 14:9; 1 Kor 14:15]

Imbeni kwa akili.

⁸Mungu awamiliki mataifa,

Mungu ameketi katika kiti chake kitakatifu.

⁹Wakuu wa watu wamekusanyika,

Wawe watu wa Mungu wa Ibrahimu.

Maana ngao za dunia zina Mungu,

Ametukuka sana.