Sala ya Kurejeshwa kwa Israeli

¹Wewe uchungaye Israeli, usikie,[#Kut 25:22; Kum 33:2; 1 Sam 4:4; Zab 89:1]

Wewe umwongozaye Yusufu kama kundi;

Wewe uketiye juu ya makerubi, utoe nuru.

²Mbele ya Efraimu, na Benyamini, na Manase,

Uziamshe nguvu zako,

Uje, utuokoe.

³Ee Mungu, uturudishe,[#1 Fal 18:37]

Uangazishe uso wako nasi tutaokoka.

⁴Ee BWANA, Mungu wa majeshi, hata lini

Utayaghadhibikia maombi ya watu wako?

⁵Umewalisha mkate wa machozi,

Umewanywesha machozi kwa kipimo kikuu.

⁶Unatufanya sababu ya ugomvi kwa jirani zetu,

Na adui zetu wanacheka wao kwa wao.

⁷Ee Mungu wa majeshi, uturudishe,

Uangazishe uso wako nasi tutaokoka.

⁸Ulileta mzabibu kutoka Misri,[#Isa 5:1,7; Yer 2:21; Eze 15:6]

Ukawafukuza mataifa ukaupanda.

⁹Ulitengeneza nafasi mbele yake,

Nao ukatia mizizi sana ukaijaza nchi.

¹⁰Milima ilifunikwa kwa uvuli wake,

Matawi yake ni kama mierezi ya Mungu.

¹¹Nao uliyaeneza matawi yake hata baharini,[#Kut 23:31; Zab 72:8]

Na vichipukizi vyake hata kunako Mto.

¹²Kwa nini umezibomoa kuta zake,[#Isa 5:5]

Wakauchuma wote wapitao njiani?

¹³Nguruwe wa msituni wanauharibu,

Na hayawani wa kondeni wanautafuna.

¹⁴Ee Mungu wa majeshi, tunakusihi, urudi,[#Zek 1:12,16,17; Isa 63:15]

Utazame toka juu uone, uujilie mzabibu huu.

¹⁵Na mche ule ulioupanda[#Isa 49:5]

Kwa mkono wako wa kuume;

Na tawi lile ulilolifanya

Kuwa imara kwa nafsi yako.

¹⁶Umechomwa moto; umekatwa;

Kwa lawama ya uso wako wanapotea.

¹⁷Mkono wako na uwe juu yake[#Zab 89:21; Kut 4:22; Zab 110:1; Dan 7:13,14; Yn 5:21-27]

Mtu wa mkono wako wa kuume;

Juu ya mwanadamu uliyemfanya

Kuwa imara kwa nafsi yako;

¹⁸Basi hatutakuacha kwa kurudi nyuma;

Utuhuishe nasi tutaliitia jina lako.

¹⁹Ee BWANA, Mungu wa majeshi, uturudishe,[#Hes 6:25; Zab 27:4,9]

Uangazishe uso wako nasi tutaokoka.