MGA AWIT 110

Awit ni David.

¹Sinabi ng Panginoon sa aking panginoon,[#Mat. 22:44; Mar. 12:36; Luc. 20:42, 43; Gawa 2:34, 35; Heb. 1:13.]

Umupo ka sa aking kanan,

Hanggang sa aking gawing tungtungan mo ang iyong mga kaaway.

²Pararatingin ng Panginoon ang setro ng iyong kalakasan mula sa Sion:[#Is. 11:1.; #Awit 68:35.]

Magpuno ka sa gitna ng iyong mga kaaway.

³Ang bayan mo'y naghahandog na kusa

Sa kaarawan ng iyong kapangyarihan, sa kagandahan ng kabanalan:

Mula sa bukang liwayway ng umaga,

Ikaw ay may hamog ng iyong kabinataan.

⁴Sumumpa ang Panginoon, at hindi magsisisi,[#Heb. 7:21.]

Ikaw ay saserdote magpakailan man

Ayon sa pagkasaserdote ni Melchisedech.

⁵Ang Panginoon sa iyong kanan ay[#Awit 16:8.]

Hahampas sa mga hari sa kaarawan ng kaniyang poot.

⁶Siya'y hahatol sa gitna ng mga bansa,

Kaniyang pupunuin ng mga bangkay ang mga pook ;

Siya'y manghahampas ng ulo sa maraming lupain.

⁷Siya'y iinom sa batis sa daan:[#Huk. 7:5, 6.]

Kaya't siya'y magtataas ng ulo.