MGA AWIT 118

Pagpapasalamat sa pagliligtas ng Panginoon.

¹Oh mangagpasalamat kayo sa Panginoon; sapagka't siya'y mabuti:[#1 Cron. 16:34, 41; Awit 106:1.]

Sapagka't ang kaniyang kagandahang-loob ay magpakailan man.

²Magsabi ngayon ang Israel,[#Awit 115:9-11.]

Na ang kaniyang kagandahang-loob ay magpakailan man.

³Magsabi ngayon ang sangbahayan ni Aaron,

Na ang kaniyang kagandahang-loob ay magpakailan man.

⁴Mangagsabi ngayon ang nangatatakot sa Panginoon,

Na ang kaniyang kagandahang-loob ay magpakailan man.

⁵Sa aking kapanglawan ay tumawag ako sa Panginoon:[#Awit 120:1.]

Sinagot ako ng Panginoon, at inilagay ako sa maluwag na dako.

⁶Ang Panginoon ay kakampi ko; hindi ako matatakot:[#Heb. 13:6.; #Awit 56:4, 11.]

Anong magagawa ng tao sa akin?

⁷Ang Panginoon ay kakampi ko sa gitna nila na nagsisitulong sa akin:[#Awit 54:4.]

Kaya't makikita ko ang nasa ko sa kanila na nangagtatanim sa akin.

⁸Lalong mabuti ang manganlong sa Panginoon[#Awit 146:3.]

Kay sa maglagak ng tiwala sa tao.

⁹Lalong mabuti ang manganlong sa Panginoon

Kay sa maglagak ng tiwala sa mga pangulo.

¹⁰Kinubkob ako ng lahat ng mga bansa sa palibot:

Sa pangalan ng Panginoon ay aking ihihiwalay sila.

¹¹Kanilang kinubkob ako sa palibot; oo, kanilang kinubkob ako sa palibot:

Sa pangalan ng Panginoon ay aking ihihiwalay sila.

¹²Kanilang kinubkob ako sa palibot na parang mga pukyutan: sila'y nangamatay na parang apoy ng mga dawag:[#Deut. 1:44.; #Awit 58:9.]

Sa pangalan ng Panginoon ay aking ihihiwalay sila.

¹³Itinulak mo akong bigla upang ako'y mabuwal:

Nguni't tulungan ako ng Panginoon.

¹⁴Ang Panginoon ay aking kalakasan at awit;[#Ex. 15:2; Is. 12:2.]

At siya'y naging aking kaligtasan.

¹⁵Ang tinig ng kagalakan at kaligtasan ay nasa mga tolda ng matuwid:

Ang kanan ng Panginoon ay gumagawang matapang.

¹⁶Ang kanan ng Panginoon ay nabunyi;[#Luc. 1:51.]

Ang kanan ng Panginoon ay gumagawang matapang.

¹⁷Hindi ako mamamatay, kundi mabubuhay,[#Hab. 1:12.]

At magpapahayag ng mga gawa ng Panginoon.

¹⁸Pinarusahan akong mainam ng Panginoon;[#2 Cor. 6:9.]

Nguni't hindi niya ako ibinigay sa kamatayan.

¹⁹Buksan ninyo sa akin ang mga pintuan ng katuwiran;[#Awit 24:7, 9.]

Aking papasukan, ako'y magpapasalamat sa Panginoon.

²⁰Ito'y siyang pintuan ng Panginoon;

Papasukan ng matuwid.

²¹Ako'y magpapasalamat sa iyo, sapagka't sinagot mo ako!

At ikaw ay naging aking kaligtasan.

²²Ang bato na itinakuwil ng nangagtayo ng bahay[#Mat. 21:42; Mar. 12:10, 11; Luc. 20:17; Gawa 4:11; Ef. 2:20; 1 Ped. 2:4, 7.]

Ay naging pangulo sa sulok.

²³Ito ang gawa ng Panginoon:

Kagilagilalas sa harap ng ating mga mata.

²⁴Ito ang araw na ginawa ng Panginoon;

Tayo'y mangagagalak at ating katutuwaan.

²⁵Magligtas ka ngayon, isinasamo namin sa iyo, Oh Panginoon:

Oh Panginoon, isinasamo namin sa iyo, magsugo ka ngayon ng kaginhawahan.

²⁶Mapalad siya na dumarating sa pangalan ng Panginoon:[#Mat. 21:9; 23:39; Mar. 11:9; Luc. 13:35.]

Aming pinuri kayo mula sa bahay ng Panginoon.

²⁷Ang Panginoon ay Dios, at binigyan niya kami ng liwanag;[#Awit 97:11.]

Talian ninyo ang hain ng mga panali, sa makatuwid baga'y sa mga tila sungay ng dambana.

²⁸Ikaw ay aking Dios, at magpapasalamat ako sa iyo:

Ikaw ay aking Dios, aking ibubunyi ka.

²⁹Oh mangagpasalamat kayo sa Panginoon, sapagka't siya'y mabuti:[#tal. 1.]

Sapagka't ang kaniyang kagandahang-loob ay magpakailan man.