The chat will start when you send the first message.
1Dinggin mo ang dalangin ko Oh Panginoon; pakinggan mo ang aking mga pamanhik:
Sa iyong pagtatapat ay sagutin mo ako, at sa iyong katuwiran.
2At huwag kang masok sa kahatulan na kasama ng iyong lingkod;[#Job 14:3.]
Sapagka't sa iyong paningin ay walang taong may buhay na aariing ganap.
3Sapagka't pinagusig ng kaaway ang kaluluwa ko;
Kaniyang sinaktan ang aking buhay ng lugmok sa lupa:
Kaniyang pinatahan ako sa mga madilim na dako, gaya ng mga namatay nang malaon.
4Kaya't ang aking diwa ay nanglulupaypay sa loob ko;
Ang puso ko sa loob ko ay bagbag.
5Aking naaalaala ang mga araw ng una;[#Awit 77:11.]
Aking ginugunita ang lahat mong mga gawa:
Aking binubulay ang gawa ng iyong mga kamay.
6Iginawad ko ang aking mga kamay sa iyo:[#Job 11:13.]
Ang aking kaluluwa ay nananabik sa iyo, na parang uhaw na lupain. (Selah)
7Magmadali kang sagutin mo ako, Oh Panginoon; ang diwa ko'y nanglulupaypay:
Huwag mong ikubli ang iyong mukha sa akin;
Baka ako'y maging gaya nila na nagsibaba sa hukay.
8Iparinig mo sa akin ang iyong kagandahang-loob sa kinaumagahan;[#Awit 5:3.]
Sapagka't sa iyo ako tumitiwala:
Ipabatid mo sa akin ang daan na aking dapat lakaran;
Sapagka't itinaas ko ang aking kaluluwa sa iyo.
9Iligtas mo ako, Oh Panginoon, sa aking mga kaaway:
Tumatakas ako sa iyo upang ikubli mo ako.
10Turuan mo akong gumawa ng iyong kalooban;[#Awit 25:4, 5.]
Sapagka't ikaw ay aking Dios:
Ang iyong Espiritu ay mabuti;
Patnubayan mo ako sa lupain ng katuwiran.
11Buhayin mo ako, Oh Panginoon, dahil sa iyong pangalan:[#Awit 25:11; 71:20.]
Sa iyong katuwiran ay ilabas mo ang aking kaluluwa sa kabagabagan,
12At sa iyong kagandahang-loob ay ihiwalay mo ang aking mga kaaway,[#Awit 54:5.]
At lipulin mo ang lahat na nagsisidalamhati sa aking kaluluwa;
Sapagka't ako'y iyong lingkod.