MGA AWIT 16

Ang Panginoon ay bahagi ng buhay ng mangaawit at tagapagligtas sa kamatayan. Awit ni David.

¹Ingatan mo ako, Oh Dios; sapagka't sa iyo nanganganlong ako.

²Oh kaluluwa ko , iyong sinabi sa Panginoon, Ikaw ay aking Panginoon:

Ako'y walang kabutihan liban sa iyo.

³Tungkol sa mga banal na nangasa lupa,

Sila ang maririlag na mga kinalulugdan kong lubos.

⁴Ang mga kalumbayan nila ay dadami, na nangaghahandog sa ibang dios:

Ang kanilang inuming handog na dugo ay hindi ko ihahandog,

Ni sasambitin man ang kanilang mga pangalan sa aking mga labi.

⁵Ang Panginoon ay siyang bahagi ng aking mana at ng aking saro:[#Deut. 32:9; Panag. 3:24.; #Awit 23:5.]

Iyong inaalalayan ang aking kapalaran.

⁶Ang pising panukat ay nangahulog sa akin sa mga maligayang dako;

Oo, ako'y may mainam na mana.

⁷Aking pupurihin ang Panginoon na nagbibigay sa akin ng payo:

Oo, tinuturuan ako sa gabi ng aking puso.

⁸Aking inilagay na lagi ang Panginoon sa harap ko:[#Awit 119:30; Gawa 2:25-28.]

Sapagka't kung siya ay nasa aking kanan, hindi ako makikilos.

⁹Kaya't ang aking puso ay masaya, at ang aking kaluwalhatian ay nagagalak:

Ang akin namang katawan ay tatahang tiwasay.

¹⁰Sapagka't hindi mo iiwan ang aking kaluluwa sa Sheol;[#Gawa 13:35.; #Awit 30:3.]

Ni hindi mo man titiisin ang iyong banal ay makakita ng kabulukan.

¹¹Iyong ituturo sa akin ang landas ng buhay:[#Mat. 7:14.]

Nasa iyong harapan ang kapuspusan ng kagalakan;

Sa iyong kanan ay may mga kasayahan magpakailan man.