MGA AWIT 32

Kapalaran ng pagpapatawad at ng pagtitiwala sa Panginoon. Awit ni David. Masquil.

¹Mapalad siyang pinatawad ng pagsalangsang,[#Rom. 4:7, 8.]

Na tinakpan ang kasalanan.

²Mapalad ang tao na hindi paratangan ng kasamaan ng Panginoon,[#2 Cor. 5:19.]

At walang pagdaraya ang diwa niya.

³Nang ako'y tumahimik, ay nanglumo ang aking mga buto[#Awit 102:3.]

Dahil sa aking pagangal buong araw.

⁴Sapagka't araw at gabi ay mabigat sa akin ang iyong kamay:[#1 Sam. 5:6, 11; Awit 38:2.]

Ang aking lamig ng katawan ay naging katuyuan ng taginit. (Selah)

⁵Aking kinilala ang aking kasalanan sa iyo,[#Awit 51:3.]

At ang aking kasamaan ay hindi ko ikinubli:

Aking sinabi, Aking ipahahayag ang aking pagsalangsang sa Panginoon;

At iyong ipinatawad ang kasamaan ng aking kasalanan.

⁶Dahil dito'y dalanginan ka nawa ng bawa't isa na banal sa panahong masusumpungan ka:[#Awit 69:13.]

Tunay na pagka ang mga malaking tubig ay nagsisiapaw ay hindi aabutan nila siya.

⁷Ikaw ay aking kublihang dako; iyong iingatan ako sa kabagabagan;[#Awit 9:9.]

Iyong kukulungin ako sa palibot ng mga awit ng kaligtasan. (Selah)

⁸Aking ipaaalam sa iyo at ituturo sa iyo ang daan na iyong lalakaran:[#Awit 73:24.]

Papayuhan kita na ang aking mga mata, ay nakatitig sa iyo.

⁹Huwag nawa kayong maging gaya ng kabayo, o gaya ng mula na walang unawa:[#Awit 33:18, 22.]

Na marapat igayak ng busal at ng paningkaw upang ipangpigil sa kanila,

Na kung dili'y hindi sila magsisilapit sa iyo.

¹⁰Maraming kapanglawan ay sasapit sa masama:[#Kaw. 13:21; Rom. 2:9.]

Nguni't siyang tumitiwala sa Panginoon, kagandahang-loob ang liligid sa kaniya sa palibot.

¹¹Kayo'y mangatuwa sa Panginoon, at mangagalak kayo, kayong mga matuwid:[#Awit 24:10; 68:3.]

At magsihiyaw kayo ng dahil sa kagalakan kayong lahat na matuwid sa puso.