MGA AWIT 86

Dalangin ni David.

¹Ikiling mo ang iyong pakinig, Oh Panginoon, at sagutin mo ako;

Sapagka't ako'y dukha at mapagkailangan.

²Ingatan mo ang aking kaluluwa; sapagka't ako'y banal:[#Awit 50:5.]

Oh ikaw na Dios ko, iligtas mo ang iyong lingkod na tumitiwala sa iyo.

³Maawa ka sa akin, Oh Panginoon,[#Awit 56:1.]

Sapagka't sa iyo'y dumadaing ako buong araw.

⁴Bigyan mong galak ang kaluluwa ng iyong lingkod;

Sapagka't sa iyo, Oh Panginoon, itinataas ko ang aking kaluluwa.

⁵Sapagka't ikaw, Panginoon, ay mabuti, at mapagpatawad,

At sagana sa kagandahang-loob sa lahat na tumatawag sa iyo.

⁶Dinggin mo, Oh Panginoon, ang aking dalangin;[#Awit 55:1, 2.]

At pakinggan mo ang tinig ng aking mga pananaing.

⁷Sa kaarawan ng aking kabagabagan ay tatawag ako sa iyo;[#Awit 77:2.]

Sapagka't iyong sasagutin ako.

⁸Walang gaya mo sa gitna ng mga dios, Oh Panginoon;[#Ex. 15:11.]

Wala mang mga gawang gaya ng iyong mga gawa.

⁹Lahat ng mga bansa na iyong nilalang ay magsisiparito, at magsisisamba sa harap mo, Oh Panginoon;[#Awit 22:31; Is. 66:18; Apoc. 15:4.]

At kanilang luluwalhatiin ang iyong pangalan.

¹⁰Sapagka't ikaw ay dakila, at gumagawa ng kagilagilalas na mga bagay:

Ikaw na magisa ang Dios.

¹¹Ituro mo sa akin ang iyong daan, Oh Panginoon; lalakad ako sa iyong katotohanan:[#Awit 27:11.; #Awit 26:3.]

Ilakip mo ang aking puso sa pagkatakot sa iyong pangalan.

¹²Pupurihin kita, Oh Panginoon kong Dios ng aking buong puso;

At luluwalhatiin ko ang iyong pangalan magpakailan man.

¹³Sapagka't dakila ang iyong kagandahang-loob sa akin;

At iyong iniligtas ang aking kaluluwa sa pinakamalalim na Sheol.

¹⁴Oh Dios, ang palalo ay bumangon laban sa akin,[#Awit 54:3.]

At ang kapisanan ng mga marahas na tao ay umusig ng aking kaluluwa,

At hindi inilagay ka sa harap nila.

¹⁵Nguni't ikaw, Oh Panginoon, ay Dios na puspos ng kahabagan at mapagbiyaya,[#Ex. 34:6.]

Banayad sa pagkagalit, at sagana sa kagandahang-loob at katotohanan.

¹⁶Oh bumalik ka sa akin, at maawa ka sa akin;[#Awit 25:16.]

Ibigay mo ang lakas mo sa iyong lingkod.

At iligtas mo ang anak ng iyong lingkod na babae.

¹⁷Pagpakitaan mo ako ng tanda sa ikabubuti:[#Neh. 5:19; 13:31.]

Upang mangakita nilang nangagtatanim sa akin, at mangapahiya,

Sapagka't ikaw, Panginoon, ay tumulong sa akin, at umaliw sa akin.