Mangangaral 8

¹Walang katulad ang taong marunong

na kayang magpaliwanag ng mga bagay.

Ang karunungan ng taoʼy

nakapagpapasaya ng mukha,

at ang simangot ay nawawala.

Sundin ang Hari

²Sundin mo ang utos ng hari, dahil ipinangako mo sa Diyos na gagawin mo ito.

³Huwag mong pababayaan ang tungkulin mo sa hari, at huwag kang sasáma sa mga nagpaplano ng masama laban sa kanya, dahil kayang gawin ng hari ang anumang gustuhin niya.[#8:3 : O Huwag kang aalis sa harapan ng hari; huwag kang pumunta sa delikadong lugar.]

⁴Makapangyarihan ang utos ng hari at walang makakatutol dito.

⁵Ang sinumang sumusunod sa kanyang utos

ay hindi mapapahamak.

Alam ng taong marunong kung kailan

at kung paano gagawin ang isang bagay.

⁶Dahil ang bawat bagay

ay may kanya-kanyang tamang oras

at pamamaraan ng paggawa

gaano man kabigat ang kinakaharap ng tao.

⁷Dahil walang sinuman

ang nakakaalam ng hinaharap,

walang makapagsasabi

kung ano ang mangyayari.

⁸Kung paanong

hindi mapipigilan ng tao ang hangin,

hindi rin niya mapipigilan

ang kanyang kamatayan.

Tulad sa isang labanan,

hindi siya makakaatras.

At ang kasamaan niyaʼy hindi makapagliligtas

sa kanya sa kamatayan.

⁹Pinagmasdan ko ang mga bagay na nangyayari rito sa mundo, nakita kong ang mga tao ay may kakayahang saktan ang isaʼt isa.

¹⁰Nakita ko ring ibinuburol ang masasamâ. Sila ang laging pumapasok sa banal na lungsod ng Jerusalem at doon gumagawa ng kasamaan. At pinupuri pa sila ng mga taong tagaroon mismo sa lugar na ginagawan nila ng kasamaan. Wala itong kabuluhan.[#8:10 : Ito ang nasa Septuagint at ibang tekstong Hebreo. Pero karamihan sa tekstong Hebreo, kinakalimutan.]

¹¹Kapag ang taong nagkasalaʼy hindi agad pinarusahan, naiisip din ng iba na gumawa ng kasalanan.

¹²Kahit ang isang taoʼy magkasala ng isang daang beses at mabuhay pa nang matagal, alam kong mas mabuti pa rin ang kahihinatnan ng taong may takot sa Diyos.

¹³Hindi magtatagal ang buhay ng taong masama na walang takot sa Diyos. Magiging parang anino ang buhay niya, sandali lang at agad mawawala.

¹⁴Ang problema lang sa mundong ito ay kung minsan ang mga taong matuwid pa ang siyang napaparusahan ng parusang para sana sa masasamâ. At ang masasama naman ang siyang tumatanggap ng gantimpalang para sana sa mga matuwid. Ito man ay walang kabuluhan.

¹⁵Kaya para sa akin, mas mabuting magpakasaya ang tao sa buhay. Walang mas mabuti para sa kanya dito sa mundo kundi ang kumain, uminom at magsaya. Sa ganitong paraan mararanasan niya ang kasiyahan habang nagpapakapagod siya sa buong buhay niya na ibinigay ng Diyos sa kanya dito sa mundo.

¹⁶Habang pinagsisikapan kong intindihin ang mga nangyayari rito sa mundo, nalaman ko kung gaano kaabala sa trabaho ang mga tao araw at gabi.

¹⁷Nakita ko rin ang mga ginagawa ng Diyos dito sa mundo. Walang sinuman ang makakaintindi nito. Kahit ano pa ang gawin ng tao para intindihin ito, hindi pa rin niya ito maiintindihan. Kahit sabihin pa ng marunong na naiintindihan niya, pero ang totoo, hindi niya talaga naiintindihan.