Ezekiel 15

Jerusalem, ang Walang Kabuluhang Sanga ng Ubas

¹Sinabi sa akin ng Panginoon ,

²“Anak ng tao, sa anong paraan nakakahigit ang sanga ng ubas sa ibang punongkahoy?

³Ang mga sanga ba nito ay magagamit sa iba pang mga bagay? Maaari ba itong gawing sabitan?

⁴Hindi! Maaari lang itong gamiting panggatong; ganoon pa man madali itong matutupok.

⁵Hindi na nila ito magamit noong itoʼy buo pa, mas lalo na ngayong ito sinunog na ng apoy.

⁶“Ngayon, ako, ang Makapangyarihang Panginoon , ay nagsasabi na ang mga mamamayan ng Jerusalem ay tulad ng baging ng ubas na tumutubong kasama ng mga punongkahoy sa kagubatan. Dahil itoʼy walang kabuluhan, susunugin ko sila.

⁷Oo, parurusahan ko sila at kahit na makatakas sila sa apoy, tutupukin pa rin sila ng isa pang apoy. At malalaman nila na ako ang Panginoon .

⁸Gagawin kong tiwangwang ang lugar nila dahil nagtaksil sila sa akin. Ako, ang Makapangyarihang Panginoon , ang nagsasabi nito.”