1Makinig kayo!
Wawasakin ng Panginoon ang mundo
hanggang sa hindi na
ito mapakinabangan.
Sisirain niya ang ibabaw nito
at ikakalat niya
ang mga mamamayan nito.
2Iisa ang sasapitin ng lahat:
pari man o mamamayan,
amo man o alipin,
nagtitinda man o bumibili,
nagpapautang man o umuutang.
3Lubusang mawawasak ang mundo
at walang matitira rito.
Ang Panginoon ang nagsabi nito.
4Matutuyo at titigas ang lupa.
Manlulumo ang buong mundo
pati na ang mga kilala
at makapangyarihang mga tao.
5Ang mundo ay dinungisan
ng mga mamamayan nito,
dahil hindi nila sinunod
ang Kautusan ng Diyos
at ang kanyang mga tuntunin.
Nilabag nila ang walang hanggang kasunduan
ng Diyos sa kanila.
6Kaya isusumpa ng Diyos ang mundo,
at mananagot ang mga mamamayan nito
dahil sa kanilang mga kasalanan.
Susunugin sila
at iilan lang ang matitira.
7Malalanta ang mga ubas,
at mauubos ang alak na galing dito.
Ang lahat ng nagsasaya
ay mapapabuntong-hininga.
8Titigil ang masayahing
tunog ng mga tamburin,
mawawala ang ingay
ng mga taong nagdiriwang,
at tatahimik ang masayahing
tunog ng alpa.
9Mawawala ang awitan
sa kanilang pag-iinuman,
at ang inumin ay magiging mapait.
10Ang nawasak na lungsod
ay mapapabayaan.
Isasara ang pintuan
ng bawat tahanan.
11Sisigaw ang mga tao sa lansangan,
na naghahanap ng alak.
Ang kanilang kaligayahan
ay mapapalitan ng kalungkutan.
Ang kasiyahan ay maglalaho
sa balat ng lupa.
12Ang lungsod ay mananatiling wasak,
pati ang mga pintuan nito ay sira-sira.
13Iilan na lamang ang matitirang tao
sa lahat ng bansa sa mundo,
tulad ng puno ng olibo
na nalagas ang bunga
o ng ubasang kaunti ang naiwan
pagkatapos ng anihan.
14Ang mga matitirang tao ay sisigaw
at aawit nang may kaligayahan.
Ang mga nasa kanluran ay magpapahayag
tungkol sa kapangyarihan ng Panginoon .
15Kaya nararapat ding purihin
ng mga tao sa silangan
at ng mga lugar na malapit sa dagat
ang Panginoon , ang Diyos ng Israel.
16Maririnig ang awitan
sa ibaʼt ibang sulok ng mundo,
“Luwalhati sa Diyos na Makatarungan.”
Ngunit kahabag-habag ako.
Akoʼy nanghihina!
Nagtataksil ang mga taksil!
Patuloy ang paggawa nila ng kataksilan!
17Kayong mga mamamayan
ng mga bansa sa buong mundo,
naghihintay sa inyo ang takot,
hukay, at bitag.
18Ang tumatakas dahil sa takot
ay mahuhulog sa hukay
at mabibitag ang mga lumalabas dito.
Uulan nang malakas
at mayayanig ang pundasyon ng lupa.
19Ang daigdig ay lubusang mawawasak;
mabibiyak ang lupa
at labis itong mayayanig.
20At magpapasuray-suray ito
na parang lasing
at parang kubong gumagalaw-galaw
sa ihip ng hangin.
Ang lupa ay mabibigatan dahil sa kasalanan,
at mawawasak ito
at hindi na muling makakabangon.
21Sa araw na iyon,
parurusahan ng Panginoon
ang mga makapangyarihang
nilalang sa langit,
pati ang mga hari dito sa mundo.
22Sama-sama silang ihuhulog sa hukay
na katulad ng mga bilanggo.
Ikukulong sila sa bilangguang iyon
at saka parurusahan
pagkatapos ng maraming araw.
23Kung magkagayoʼy mamumutla ang buwan,
at magtatago sa kahihiyan ang araw,
sapagkat ang Panginoon ng mga Hukbo
ay maghahari
sa Bundok Zion sa Jerusalem.
Mamamahala siyang puno ng kaluwalhatian
sa harapan ng mga pinuno nito.