Salmo 18

Salmo 18

¹Minamahal ko kayo Panginoon ,

kayo ang aking kalakasan.

²Panginoon , kayo ang aking matibay

na batong kanlungan

at tagapagligtas.

Kayo, O Diyos, ang aking matibay

na batong kanlungan

na nag-iingat sa akin,

kayo ang aking pananggalang,

tanggulan at matatag na kuta.

³Karapat-dapat kayong purihin, Panginoon ,

dahil kapag tumatawag ako sa inyo,

inililigtas nʼyo ako sa mga kalaban ko.

^4-5Ang kamatayaʼy parang lubid

na nakapulupot sa akin

at parang bitag sa aking daraanan,

na para ring malakas na agos

na tumatangay sa akin.

⁶Kinakabahan ako!

Humingi ako ng tulong sa inyo,

Panginoon na aking Diyos.

At mula sa inyong Templo,

pinakinggan nʼyo ang panalangin ko.

⁷Dahil sa inyong galit ay lumindol,

maging ang pundasyon ng mga bundok ay nayanig.

⁸Umusok din ang inyong ilong,

at ang inyong bibig ay bumuga ng apoy

at mga nagliliyab na baga.

⁹Binuksan nʼyo ang langit at kayoʼy bumabâ,

at tumuntong sa maitim at makapal na ulap.

¹⁰Kayoʼy sumakay sa isang kerubin,

at mabilis na lumipad na dala ng hangin.

¹¹Ginawa nʼyong talukbong ang kadiliman,

at nagtago kayo sa maitim na ulap.

¹²Mula sa ningning ng kanyang presensyaʼy

lumitaw ang makakapal na ulap,

at bumagsak ang mga yelo at nagliliyab na baga.

¹³Ang tinig nʼyo, Kataas-taasang Diyos na aming Panginoon ,

ay dumadagundong mula sa langit.

¹⁴Pinana nʼyo ng kidlat ang inyong mga kalaban

at nataranta silang nagsitakas.

¹⁵Sa inyong tinig at matinding galit,

natuyo ang dagat at nakita

ang lupa sa ilalim nito,

pati na rin ang pundasyon ng mundo ay nalantad.

¹⁶At mula sa langit akoʼy inabot nʼyo

at inahon mula sa malalim na tubig.

¹⁷Iniligtas nʼyo ako sa kapangyarihan

ng aking mga kalaban na hindi ko

kayang labanan.

¹⁸Sinalakay nila ako sa oras ng aking kagipitan.

Ngunit sinaklolohan nʼyo ako, Panginoon .

¹⁹Dinala nʼyo ako sa lugar na walang kapahamakan

dahil nalulugod kayo sa akin.

²⁰Pinagpala nʼyo ako

dahil akoʼy namumuhay sa katuwiran.

Sa kalinisan ng aking kamay

akoʼy inyong ginantimpalaan.

²¹Dahil sinusunod ko ang inyong kalooban,

at hindi ko kayo tinalikuran,

Panginoon na aking Diyos.

²²Tinutupad ko ang lahat ng inyong utos.

Ang inyong mga tuntunin ay hindi ko sinusuway.

²³Alam nʼyong namumuhay ako nang walang kapintasan,

at iniiwasan ko ang kasamaan.

²⁴Kaya naman akoʼy inyong ginagantimpalaan,

dahil nakita nʼyong matuwid ang aking pamumuhay.

²⁵Tapat kayo sa mga tapat sa inyo,

at mabuti kayo sa mabubuting tao.

²⁶Tapat kayo sa mga taong totoo sa inyo,

ngunit tuso kayo sa mga taong masama.

²⁷Inililigtas nʼyo ang mga mapagpakumbaba,

ngunit ang nagmamataas

ay inyong ibinababa.

²⁸Panginoon kong Diyos, kayo ang nagbibigay

sa akin ng liwanag.

Sa gitna ng kadiliman

kayo ang aking tanglaw.

²⁹Sa tulong nʼyo, kaya kong salakayin

ang grupo ng mga sundalo,

at kaya kong akyatin ang pader

ng kanilang tanggulan.

³⁰Ang pamamaraan nʼyo,

O Diyos ay walang kamalian.

Ang inyong mga salita ay maaasahan.

Kayoʼy katulad ng isang kalasag

sa mga kumakanlong sa inyo.

³¹Sapagkat kayo lang, Panginoon ,

ang tunay na Diyos,

at wala nang iba.

At kayo lang talaga

ang aming Batong kanlungan.

³²Kayo, O Diyos, ang nagbibigay sa akin ng kalakasan,

at nagbabantay sa aking daraanan.

³³Pinatatatag nʼyo ang aking paa

tulad ng paa ng usa,

upang maging ligtas ang pag-akyat ko

sa matataas na lugar.

³⁴Sinasanay nʼyo ako sa pakikipaglaban,

at ang aking brasoʼy nakakabanat ng panang tanso.

³⁵Ang katulad nʼyo ay kalasag na nag-iingat sa akin.

Inaakay nʼyo ako sa pamamagitan

ng inyong kapangyarihan,

at dahil sa tulong nʼyo, naging tanyag ako.

³⁶Pinaluwang nʼyo ang aking daraanan,

kaya hindi ako natitisod.

³⁷Hinabol ko ang aking mga kalaban

at inabutan ko sila,

at hindi ako tumigil

hanggang sa naubos ko sila.

³⁸Hinampas ko sila hanggang sa magsibagsak,

at hindi na makabangon sa aking paanan.

³⁹Binigyan nʼyo ako ng lakas sa pakikipaglaban,

kaya natalo ko ang aking mga kaaway.

⁴⁰Pinaatras ninyo ang aking mga kaaway

at pinatay ko ang mga galit sa akin.

⁴¹Humingi sila ng tulong,

ngunit walang tumulong sa kanila.

Tumawag din sila sa inyo Panginoon ,

ngunit kayoʼy hindi tumugon.

⁴²Dinurog ko sila hanggang sa naging alikabok na lang

na inililipad ng hangin,

at tinatapak-tapakan na parang putik sa kalsada.

⁴³Akoʼy iniligtas nʼyo sa mga rebelde,

at ginawa nʼyo akong pinuno

ng maraming bansa.

Kahit ang mga hindi nakakakilala sa akin,

pinaglingkuran na nila ako ngayon.

⁴⁴Yumuyukod sila sa aking harapan.

Naririnig pa lang nila ang tungkol sa akin,

sumusunod agad sila sa utos ko.

⁴⁵Nawawalan sila ng lakas ng loob,

kaya lumalabas sila sa kanilang pinagtataguan

na nanginginig sa takot.

⁴⁶Buháy kayo, Panginoon !

Karapat-dapat kayong purihin at dakilain,

O Diyos na aking batong kanlungan

at Tagapagligtas!

⁴⁷Kayo, O Diyos, ang naghihiganti para sa akin,

at ipinapasailalim mo ang mga bansa

sa aking kapangyarihan.

⁴⁸Inililigtas nʼyo ako sa mararahas kong kalaban,

at pinagtatagumpay nʼyo ako sa kanila.

⁴⁹Kaya pararangalan ko kayo sa mga bansa.

O Panginoon , aawitan ko kayo ng mga papuri.

⁵⁰Sa hinirang nʼyong hari

ay nagbigay kayo ng maraming tagumpay.

Ipinapadama ninyo ang inyong wagas na pag-ibig

sa inyong hinirang na si David

at sa lahat ng kanyang lahi, magpakailanman.