Salmo 38

Salmo 38

¹Panginoon , sa inyong galit,

huwag nʼyo akong patuloy na parusahan.

²Ang inyong palaso ay tumagos sa akin

at ang inyong kamao ay bumaon sa akin.

³Dahil sa galit nʼyo sa akin,

nanlulupaypay ang aking katawan.

Sumasakit ang buong katawan ko

dahil sa aking mga kasalanan.

⁴Parang nalulunod na ako

sa nag-uumapaw kong kasalanan.

Itoʼy isang pasanin

na hindi ko na makayanan.

⁵Dahil sa aking kamangmangan

ang aking mga sugat

ay namamaga at nangangamoy.

⁶Akoʼy namimilipit sa sobrang sakit

at lubos ang kalungkutan ko buong araw.

⁷Sumasakit ang buo kong katawan,

at bumagsak na rin ang aking kalusugan.

⁸Akoʼy pagod na at nanghihina pa,

at dumadaing din ako

dahil sa sobrang bigat ng aking kalooban.

⁹Panginoon, alam nʼyo ang lahat kong hinahangad,

at naririnig nʼyo ang lahat kong mga daing.

¹⁰Kumakabog ang aking dibdib

at akoʼy nanghihina;

pati ang ningning ng aking mga mata

ay tuluyan nang nawala.

¹¹Dahil sa aking karamdaman,

akoʼy iniwasan ng aking mga kaibigan, kasamahan,

at maging ng aking mga kamag-anak.

¹²Ang mga tao na gustong pumatay sa akin

ay naglalagay ng bitag upang akoʼy hulihin.

Ang mga gustong manakit sa akin

ay nag-uusap na akoʼy ipahamak.

Buong araw silang nagpaplano ng kataksilan.

¹³Ngunit para akong pipi at bingi

na hindi nakaririnig

at hindi nakapagsasalita.

¹⁴Nagbibingi-bingihan ako

at hindi sumasagot sa kanila.

¹⁵Sapagkat naghihintay pa rin ako

sa inyo, Panginoon .

Batid kong sasagutin nʼyo ako,

Panginoon kong Diyos.

¹⁶Kayaʼt hinihiling ko sa inyo:

“Huwag nʼyong hayaang matuwa

ang aking mga kaaway

o kayaʼy magmalaki sila

kapag akoʼy natumba.”

¹⁷Akoʼy parang babagsak na

sa walang tigil na paghihirap.

¹⁸Inaamin ko ang aking mga kasalanan;

Binabagabag ako ng mga ito.

¹⁹Tungkol naman sa aking mga kaaway,

napakarami at napakalakas nila.

Kinamumuhian nila ako

nang walang dahilan.

²⁰Sa mabuti kong ginawa,

sinusuklian nila ako ng masama.

At kinakalaban nila ako

dahil nagsisikap akong gumawa ng mabuti.

²¹Panginoon kong Diyos,

huwag nʼyo akong pababayaan;

huwag nʼyo akong lalayuan.

²²Panginoon kong Tagapagligtas,

agad nʼyo po akong tulungan.