Salmo 4

Salmo 4

¹Ang panawagan koʼy iyong dinggin,

O Diyos na nagtatanggol sa akin.

Akoʼy bigyang kaginhawahan

sa panahon ng aking kagipitan.

Akoʼy inyong kahabagan,

panalangin ko ay pakinggan.

²Kayong mga tao,

kailan kayo titigil sa paninirang-puri sa akin?

Hanggang kailan ninyo iibigin

ang mga bagay na walang kabuluhan

at susundin ang mga bulaan?

³Tandaan ninyo:

Ibinukod ng Panginoon ang kanyang mga hinirang.

Kapag akoʼy tumawag sa kanya,

akoʼy pakikinggan niya.

⁴Kapag kayoʼy nagagalit,

huwag kayong magkakasala.

Magbulay-bulay nang may katahimikan

habang kayoʼy nakahiga sa higaan.

⁵Ialay sa Panginoon ang mga nararapat na handog

at magtiwala sa kanya.

⁶Marami ang nagsasabi,

“Sino ang magpapakita sa atin ng mabuti?”

Panginoon , ipakita po ninyo sa amin

ang inyong kabutihan!

⁷Labis na kagalakan ang inyong ibinigay sa akin,

higit pa sa kanila na sagana sa pagkain at inumin.

⁸Sa aking pagtulog, panatag ang aking loob,

sapagkat kayo, Panginoon , ang nakabantay sa akin.