Salmo 66

Salmo 66

¹Kayong mga tao sa buong mundo,

isigaw ninyo ang inyong papuri sa Diyos

nang may kagalakan.

²Umawit kayo ng mga papuri para sa kanya.

Parangalan ninyo siya sa pamamagitan

ng inyong mga awit.

³Sabihin ninyo sa kanya,

“O Diyos, kahanga-hanga ang inyong mga gawa!

Dahil sa inyong dakilang kapangyarihan,

luluhod ang inyong mga kaaway sa takot.

⁴Ang lahat ng tao sa buong mundo

ay sasamba sa inyo

na may awit ng papuri.”

⁵Halikayoʼt tingnan ang kahanga-hanga

na ginawa ng Diyos para sa mga tao.

⁶Pinatuyo niya ang dagat;

tinawid ito ng ating mga ninuno

nang naglalakad.

Tayoʼy mangagalak sa kanyang mga ginawa.

⁷Makapangyarihang maghahari ang Diyos, magpakailanman.

Mga bansaʼy kanyang pinagmamasdan,

kaya ang mga sumusuway sa kanya

ay hindi dapat magmalaki.

⁸Kayong mga tao, purihin ninyo ang Diyos!

Iparinig ninyo sa lahat ang inyong papuri.

⁹Iningatan niya ang ating buhay

at hindi niya hinayaang tayoʼy madapa.

¹⁰Sapagkat sinubok ninyo kami, O Diyos, upang dalisayin;

tulad namiʼy pilak na dinalisay sa apoy.

¹¹Hinayaan nʼyo kaming mahuli sa bitag

at pinagpasan nʼyo kami

ng mabigat na dalahin.

¹²Pinabayaan nʼyo ang aming mga kaaway

na tapakan kami sa ulo;

parang dumaan kami sa apoy

at lumusong sa baha.

Ngunit dinala nʼyo kami sa lugar ng kasaganaan.

¹³Mag-aalay ako sa inyong Templo ng mga handog na sinusunog[#66:13 : Tingnan ang kahulugan nito sa Lev. 1:3.]

upang tuparin ko ang aking mga ipinangako sa inyo,

¹⁴mga pangakong sinabi ko noong akoʼy nasa gitna ng kaguluhan.

¹⁵Mag-aalay ako sa inyo ng matatabang hayop bilang handog na sinusunog,

katulad ng mga tupa, toro at mga kambing.

¹⁶Halikayoʼt makinig, kayong lahat

na may takot sa Diyos.

Sasabihin ko sa inyo

ang mga ginawa niya sa akin.

¹⁷Humingi ako sa kanya

ng tulong habang nagpupuri.

¹⁸Kung hindi ko ipinahayag sa Panginoon

ang aking mga kasalanan,

hindi niya sana ako pakikinggan.

¹⁹Ngunit tunay ngang pinakinggan

ako ng Diyos

at ang dalangin koʼy kanyang sinagot.

²⁰Purihin ang Diyos,

na hindi tumanggi sa aking panalangin,

at hindi nagkait ng kanyang tapat na pag-ibig sa akin.