Salmo 76

Salmo 76

¹Kilalang-kilala ang Diyos sa Juda,

at sa Israel ay dakila siya.

²Nakatira siya sa bundok ng Zion sa Jerusalem.[#76:2 : Sa Hebreo, Salem. Isa rin itong pangalan ng Jerusalem na ang ibig sabihin ay “kapayapaan”.]

³Doon, sinira niya ang mga nagniningas

na palaso ng kaaway,

ang kanilang mga pananggalang, espada

at iba pang kagamitang pandigma.

⁴O Diyos, makapangyarihan kayo

at higit na dakila

habang bumababa kayo sa bundok

na kung saan pinatay nʼyo

ang inyong mga kaaway.

⁵Binawi nʼyo sa matatapang na sundalo ang kanilang mga sinamsam.

Silang lahat ay namatay na;

wala nang makakapagbuhat pa

ng kamay sa amin.

⁶O Diyos ni Jacob, sa inyong sigaw,[#76:6 : O saway.]

ang mga kawal at ang kanilang mga kabayo ay namatay.

⁷Kaya dapat kayong katakutan.

Sinong makakatagal sa inyong harapan

kapag kayoʼy nagalit?

⁸Mula sa langit ay humatol kayo.

Ang mga tao sa mundo

ay natakot at tumahimik

⁹nang humatol kayo, O Diyos,

upang iligtas ang lahat ng inaapi sa daigdig.

¹⁰Tiyak na ang galit nʼyo sa mga tao[#76:10 : O ang galit ng mga tao.]

ay magbibigay ng karangalan sa inyo,

ngunit hindi nʼyo pa lubusang ibinubuhos

ang inyong galit.

¹¹Mangako kayo sa Panginoon

na inyong Diyos at tuparin ito.

Lahat kayong mga bansang nasa paligid,

magdala kayo ng mga regalo sa Diyos

na siyang karapat-dapat katakutan.

¹²Ibinababa niya ang mapagmataas

na mga pinuno;

kinatatakutan siya ng mga hari

rito sa mundo.