Salmo 81

Salmo 81

¹Umawit kayo nang may galak

sa Diyos na nagbibigay sa atin

ng kalakasan.

Sumigaw kayo nang may tuwa

sa Diyos ni Jacob!

²Umawit kayo at tugtugin

ang tamburin

kasabay ng magandang tunog

ng alpa at lira.

³Patunugin ninyo ang tambuli

tuwing Pista ng Bagong Buwan

na ating ipinagdiriwang

tuwing kabilugan ng buwan.

⁴Dahil isa itong kautusan

para sa mga taga-Israel.

Itoʼy utos ng Diyos ni Jacob.

⁵Ibinigay niya ang kautusang ito

sa lahi ni Jose

nang siyaʼy sumalakay

sa lupain ng Ehipto.

May narinig akong tinig

ngunit hindi ko kilala.

Sinabi niya,

⁶“Kinuha ko ang mabigat niyang pasanin,

Pinalaya ko ang kanyang mga kamay sa dalahin.

⁷Nang kayoʼy nahirapan,

tumawag kayo sa akin

at kayoʼy iniligtas ko.

Mula sa mga alapaap,

sinagot ko kayo at sinubok

doon sa bukal ng Meriba.

⁸Mga Israelita, aking mamamayan,

pakinggan ninyo itong babala ko sa inyo.

Makinig kayo sa akin!

⁹Wala kayong ibang magiging diyos kundi ako lang.

Huwag kayong sumamba

sa diyos-diyosan.

¹⁰Ako ang Panginoon

na inyong Diyos.

Ako ang naglabas sa inyo

mula sa lupain ng Ehipto.

Humingi kayo sa akin

at ibibigay ko sa inyo

ang mga pangangailangan ninyo.

¹¹Ngunit kayong mga Israelita

na aking mga mamamayan,

hindi kayo nakinig at sumunod sa akin.

¹²Kaya hinayaan ko kayo

sa katigasan ng inyong ulo

at ginawa ninyo ang inyong gusto.

¹³Kung nakinig lang sana kayo sa akin

at sumunod sa aking mga pamamaraan,

¹⁴kaagad ko sanang nilupig

at pinarusahan ang inyong mga kaaway.

¹⁵Ang mga napopoot sa akin,

na Panginoon

ay yuyukod sa takot.

Ang kaparusahan nila

ay walang katapusan.

¹⁶Ngunit kayo na aking mga mamamayan,

pakakainin ko kayo ng pinakamainam

na bunga ng trigo at pulot

hanggang sa mabusog kayo.”