Mga Awit 128

Ang Bunga ng Pagsunod kay Yahweh

¹Mapalad ang bawat tao na kay Yahweh ay may takot,

ang maalab na naisi'y sumunod sa kanyang utos.

²Kakainin niya ang bunga ng kanyang pinaghirapan,

ang taong ito'y maligaya't maunlad ang pamumuhay.

³Sa tahanan, ang asawa'y parang ubas na mabunga,

at bagong tanim na olibo sa may hapag ang anak niya.

⁴Ang sinuman kung si Yahweh buong pusong susundin,

buhay niya ay uunlad at laging pagpapalain.

⁵Mula sa Zion, pagpapala nawa ni Yahweh ay tanggapin,

at makita habang buhay, pag-unlad ng Jerusalem;

⁶ang magiging iyong apo, nawa iyong makita rin,

nawa'y maging mapayapa itong bayan ng Israel!