Mga Awit 143

Panalangin Upang Tulungan ng Diyos

¹Dinggin mo, O Yahweh, ang aking dalangin,

tapat ka't matuwid, kaya ako'y dinggin.

²Itong iyong lingkod, huwag mo nang subukin,[#Ro. 3:20; Ga. 2:16.]

batid mo nang lahat, kami ay salarin.

³Ako ay tinugis ng aking kaaway,

lubos na nilupig ng aking kalaban;

sa dilim na dako, ako ay nakulong,

tulad ko'y patay nang mahabang panahon.

⁴Ang kaluluwa ko'y halos sumuko na,

sapagkat ang buhay ko'y wala nang pag-asa.

⁵Araw na lumipas, aking nagunita,

at naalala ang iyong ginawa,

sa iyong kabutihan, ako ay namangha!

⁶Ako'y dumalangin na taas ang kamay,

parang tuyong lupa ang diwa kong uhaw. (Selah)

⁷Nawala nang lahat ang aking pag-asa,

kaya naman, Yahweh, ako'y dinggin mo na!

Kung ika'y magkubli, baka ang hantungan

ako ay ituring na malamig na bangkay,

at ang tunguhin ko'y madilim na hukay.

⁸Ako ay umasa, sa iyo nagtiwala, sa pagsapit ng umaga ay ipagugunita

yaong pag-ibig mo na lubhang dakila.

Ang aking dalangin na sa iyo'y hibik,

patnubayan ako sa daang matuwid.

⁹Iligtas mo ako sa mga kalaban,

ikaw lang, O Yahweh, ang aking kanlungan.

¹⁰Ikaw ang aking Diyos, ako ay turuan

na aking masunod ang iyong kalooban;

ang Espiritu mo'y maging aking tanglaw sa aking paglakad sa ligtas na daan.

¹¹Ikaw ay nangakong ako'y ililigtas, pagkat dakila ka, iligtas mo agad;

iligtas mo ako sa mga bagabag.

¹²Dahilan sa iyong pagtingin sa akin, ang mga kaaway ko'y iyong lipulin;

ang nagpapahirap sa aki'y wasakin,

yamang ang lingkod mo ay iyong alipin.