Ecclesiastico 15

¹Kung may paggalang ka sa Panginoon, ito ang gagawin mo:

Magpapakadalubhasa ka sa Kautusan, upang makamtan mo ang Karunungan.

²Sasalubungin ka niya, tulad ng isang ina,

paglilingkuran ka, gaya ng asawang bagong kasal.

³Dudulutan ka niya ng karunungan at kaalaman,

na parang masarap na pagkain at inumin.

⁴Sumandig ka at magtiwala sa kanya,

at hindi ka magdaranas ng kabiguan.

⁵Kapag nagsalita ka sa kapulungan, ituturo niya sa iyo ang iyong sasabihin;

at magiging mas marangal ka kaysa iyong mga kasamahan.

⁶Lalasap ka ng tunay na galak at kaligayahan,

at hindi ka makakalimutan magpakailanman.

⁷Ngunit ang Karunungan ay di man lamang masisilayan,

ng mga mangmang at mahilig sa kasalanan.

⁸Lalayuan ng Karunungan ang mapagmataas,

at hindi siya papasok sa isipan ng sinungaling.

⁹Hindi marapat na ang makasalanan ay umawit ng papuri,

sapagkat hindi ito katanggap-tanggap sa Panginoon.

¹⁰Ang pag-awit ng papuri ay pagpapahayag ng karunungan,

sa pang-aakit na rin ng Panginoon.

¹¹Huwag mong sisihin ang Panginoon dahil sa iyong kasalanan,[#Ecc. 17:1-12.]

hindi niya gagawin ang kanyang kinamumuhian.

¹²Huwag mong sabihing iniligaw ka niya.

Hindi niya kailangan ang tulong ng mga imbi sa pagsasakatuparan ng kanyang mga panukala.

¹³Namumuhi ang Panginoon sa lahat ng uri ng kasalanan;

ang may paggalang sa kanya ay hindi naaakit ng anumang uri ng kabuktutan.

¹⁴Sa pasimula pa, nang lalangin niya ang tao,

ginawa na niya itong malaya na pumili ng kanyang nais.

¹⁵Kung gusto mo, masusunod mo ang utos ng Panginoon,

ikaw ang magpapasya kung magiging tapat ka sa kanya o hindi.

¹⁶Naglagay siya sa harapan mo ng tubig at ng apoy,

kunin mo ang iyong magustuhan.

¹⁷Makakapili ka ng alinman sa dalawa: buhay o kamatayan,

ang iyong mapili ang siya mong patutunguhan.

¹⁸Dakila ang Karunungan at kapangyarihan ng Panginoon;

nakikita niya ang lahat ng bagay.

¹⁹Nalalaman niya ang lahat ng ginagawa ng bawat tao,

at kinakalinga niya ang mga may takot sa kanya.

²⁰Kailanma'y wala siyang inutusang magpakasama,

o pinahintulutang magkasala.