Mga Awit 6

Panalangin sa Panahon ng Bagabag

¹O Yahweh, huwag mo akong sumbatan nang dahil lamang sa galit,[#Awit 38:1.]

o kaya'y parusahan kapag ika'y nag-iinit.

²Ubos na ang lakas ko, ako'y iyong kahabagan,

pagalingin mo ako, mga buto ko'y nangangatal.

³Ang aking kaluluwa'y lubha nang nahihirapan,

O Yahweh, ito kaya'y hanggang kailan magtatagal?

⁴Magbalik ka, O Yahweh, at buhay ko'y iligtas,

hanguin mo ako ng pag-ibig mong wagas.

⁵Kapag ako ay namatay, di na kita maaalala,

sa daigdig ng mga patay, sinong sa iyo'y sasamba?

⁶Pinanghihina ako nitong aking karamdaman;

gabi-gabi'y basa sa luha itong aking higaan,

binabaha na sa kaiiyak itong aking tulugan.

⁷Mata ko'y namamaga dahil sa aking pagluha,

halos di na makakita, mga kaaway ko ang may gawa.

⁸Kayong masasama, ako'y inyong layuan,[#Mt. 7:23; Lu. 13:27.]

pagkat dininig ni Yahweh ang aking karaingan.

⁹Dinirinig ni Yahweh ang aking pagdaing,

at sasagutin niya ang aking panalangin.

¹⁰Ang mga kaaway ko'y daranas ng matinding takot at kahihiyan;

sila'y aatras at sa biglang pagkalito'y magtatakbuhan.