Mga Awit 95

Awit ng Pagpupuri kay Yahweh

¹Tayo na't lumapit

kay Yahweh na Diyos, siya ay awitan,

ang batong kublihan,

atin ngang handugan, masayang awitan!

²Tayo na't lumapit,

sa kanyang presensya na may pasalamat,

siya ay purihin,

ng mga awiting may tuwa at galak.

³Sapagkat si Yahweh,

siya ay dakila't makapangyarihang Diyos,

ang dakilang Haring

higit pa sa sinuman na dinidiyos.

⁴Nasa kanyang palad

ang buong daigdig, pati kalaliman;

ang lahat ay kanya

maging ang mataas nating kabundukan.

⁵Kanya rin ang dagat

at pati ang lupa na kanyang nilalang.

⁶Tayo na't lumapit,

sa kanya'y sumamba at magbigay-galang,

lumuhod sa harap

ni Yahweh na siyang sa ati'y may lalang.

⁷Siya ang ating Diyos,[#Heb. 3:7-11.; #Heb. 3:15; 4:7.]

at tayo ang bayan sa kanyang pastulan,

mga tupang kanyang inaalagaan.

At ngayon kanyang salita'y ating pakinggan:

⁸“Iyang inyong puso'y[#Exo. 17:1-7; Bil. 20:2-13.]

huwag patigasin, tulad ng ginawa

ng inyong magulang

nang nasa Meriba, sa ilang ng Masah.

⁹Ako ay tinukso't

doon ay sinubok ng inyong magulang,

bagama't nakita

ang aking ginawang sila'ng nakinabang.

¹⁰Apatnapung taon,

sa inyong ninuno ako ay nagdamdam,

ang aking sinabi,

‘Sila ay suwail, walang pakundangan

at ang mga utos ko'y ayaw nilang sundin!’

¹¹Kaya't sa galit ko,[#Bil. 14:20-23; Deut. 1:34-36; Heb. 4:3, 5; Deut. 12:9-10.]

ako ay sumumpang hindi sila makakapasok

at makakapagpahinga sa aking piling.”