¹Савл же, еще дыхая прещением и убийством на ученики Господни, приступль ко архиерею,

²испроси от него послания в дамаск к соборищем, яко да аще некия обрящет того пути сущыя, мужы же и жены, связаны приведет во Иерусалим.

³Внегда же ити, бысть ему приближитися к дамаску, и внезапу облиста его свет от небесе:

⁴и пад на землю, слыша глас глаголющь ему: савле, савле, что мя гониши?

⁵Рече же: кто еси, Господи? Господь же рече: аз есмь Иисус, егоже ты гониши: жестоко ти есть противу рожну прати.

⁶Трепещя же и ужасаяся глагола: Господи, что мя хощеши творити? И Господь рече к нему: востани и вниди во град, и речется ти, что ти подобает творити.

⁷Мужие же идущии с ним стояху чудящеся, глас убо слышаще, но ни когоже видяще.

⁸Воста же савл от земли и отверстыма очима своима ни единаго видяше: ведуще же его за руку, введоша в дамаск:

⁹и бе дни три не видя, и ни яде, ниже пияше.

¹⁰Бе же некто ученик в дамасце, именем ананиа, и рече к нему Господь в видении: анание. Он же рече: се, аз, Господи.

¹¹Господь же к нему: востав поиди на стогну нарицаемую правую и взыщи в дому иудове савла именем, тарсянина: се бо, молитву деет

¹²и виде в видении мужа, именем ананию, вшедша и возложша нань руку, яко да прозрит.

¹³Отвеща же ананиа: Господи, слышах от многих о мужи сем, колика зла сотвори святым твоим во Иерусалиме:

¹⁴и зде имать власть от архиерей связати вся нарицающыя имя твое.

¹⁵Рече же к нему Господь: иди, яко сосуд избран ми есть сей, пронести имя мое пред языки и царьми и сынми израилевыми:

¹⁶аз бо скажу ему, елика подобает ему о имени моем пострадати.

¹⁷Пойде же ананиа и вниде в храмину, и возложь нань руце, рече: савле брате, Господь Иисус явлейтися на пути, имже шел еси, посла мя, яко да прозриши и исполнишися Духа свята.

¹⁸И абие отпадоша от очию его яко чешуя: прозре же абие, и востав крестися,

¹⁹и приемь пищу, укрепися. Бысть же савл с сущими в дамасце учениками дни некия:

²⁰и абие на сонмищих проповедаше Иисуса, яко сей есть Сын Божий.

²¹Дивляхуся же вси слышащии и глаголаху: не сей ли есть гонивый во Иерусалиме нарицающыя имя сие, и зде на сие прииде, да связаны тыя приведет ко архиереем?

²²Савл же паче крепляшеся и смущаше иудеи живущыя в дамасце, препирая, яко сей есть Христос.

²³Якоже исполнишася дние доволни, совещаша иудее убити его,

²⁴уведан же бысть савлу совет их: стрежаху же врат день и нощь, яко да убиют его:

²⁵поемше же его ученицы нощию, свесиша по стене в кошнице.

²⁶Пришед же савл во Иерусалим, покушашеся прилеплятися учеником: и вси бояхуся его, не верующе, яко есть ученик.

²⁷Варнава же приемь его, приведе ко апостолом и поведа им, како на пути виде Господа, и яко глагола ему, и како в дамасце дерзаше о имени Иисусове.

²⁸И бяше с ними входя и исходя во Иерусалиме и дерзая о имени Господа Иисуса.

²⁹Глаголаше же и стязашеся с еллины: они же искаху убити его.

³⁰Разумевше же братия, сведоша его в кесарию и отпустиша его в тарс.

³¹Царкви же по всей иудеи и галилеи и самарии имеяху мир, созидающяся и ходящя в страсе Господни, и утешением святаго Духа умножахуся.

³²И бысть петру, посещающу всех, снити и ко святым живущым в лидде:

³³обрете же тамо человека некоего, именем енеа, от осми лет лежаща на одре, иже бе разслаблен.

³⁴И рече ему петр: енее, исцеляет тя Иисус Христос: востани с постели твоея. И абие воста:

³⁵и видеша его вси живущии в лидде и во ассароне, иже обратишася ко Господу.

³⁶Во июппии же бе некая ученица, именем тавифа, яже сказаема глаголется серна: сия бяше исполнена благих дел и милостынь, яже творяше.

³⁷Бысть же во дни тыя, болевшей ей умрети: омывше же ю, положиша в горнице.

³⁸Близ же сущей лидде июппии, ученицы слышавше, яко петр есть в ней, послаша два мужа к нему, моляще его не обленитися приити до них.

³⁹Востав же петр иде с нима: егоже пришедша возведоша в горницу, и предсташа ему вся вдовицы плачущя и показующя ризы и одежды, елика творяше, с ними сущи, серна.

⁴⁰Изгнав же вон вся петр, преклонь колена помолися, и обращься к телу, рече: тавифо, востани. Она же отверзе очи свои, и видевши петра, седе.

⁴¹Подав же ей руку, воздвиже ю, и призвав святыя и вдовицы, постави ю живу.

⁴²Уведано же бысть се по всей июппии, и мнози вероваша в Господа.

⁴³Бысть же дни доволны пребыти ему во июппии у некоего симона усмаря.