¹Иисусу же рождшуся в вифлееме иудейстем во дни ирода царя, се, волсви от восток приидоша во Иерусалим, глаголюще:

²где есть рождейся Царь иудейский? видехом бо звезду его на востоце и приидохом поклонитися ему.

³Слышав же ирод царь смутися, и весь Иерусалим с ним.

⁴И собрав вся первосвященники и книжники людския, вопрошаше от них: где Христос раждается?

⁵Они же рекоша ему: в вифлееме иудейстем, тако бо писано есть пророком:

⁶и ты, вифлееме, земле иудова, ни чимже менши еси во владыках иудовых: из тебе бо изыдет вождь, иже упасет люди моя израиля.

⁷Тогда ирод тай призва волхвы, и испытоваше от них время явльшияся звезды,

⁸и послав их в вифлеем, рече: шедше испытайте известно о отрочати: егда же обрящете, возвестите ми, яко да и аз шед поклонюся ему.

⁹Они же послушавше царя, идоша. И се, звезда, юже видеша на востоце, идяше пред ними, дондеже пришедши ста верху, идеже бе отроча.

¹⁰Видевше же звезду, возрадовашася радостию велиею зело,

¹¹и пришедше в храмину, видеша отроча с Мариею Материю его, и падше поклонишася ему: и отверзше сокровища своя, принесоша ему дары, злато и ливан и смирну.

¹²И весть приемше во сне не возвратитися ко ироду, иным путем отидоша во страну свою.

¹³Отшедшым же им, се, ангел Господень во сне явися иосифу, глаголя: востав поими отроча и Матерь его, и бежи во египет, и буди тамо, дондеже реку ти: хощет бо ирод искати отрочате, да погубит е.

¹⁴Он же востав, поят отроча и Матерь его нощию, и отиде во египет,

¹⁵и бе тамо до умертвия иродова: да сбудется реченное от Господа пророком, глаголющим: от египта воззвах Сына моего.

¹⁶Тогда ирод видев, яко поруган бысть от волхвов, разгневася зело и послав изби вся дети сущыя в вифлееме и во всех пределех его, от двою лету и нижайше, по времени, еже известно испыта от волхвов.

¹⁷Тогда сбыстся реченное иеремием пророком, глаголющим:

¹⁸глас в раме слышан бысть, плачь и рыдание и вопль мног: рахиль плачущися чад своих, и не хотяше утешитися, яко не суть.

¹⁹Умершу же ироду, се, ангел Господень во сне явися иосифу во египте,

²⁰глаголя: востав поими отроча и Матерь его и иди в землю израилеву, изомроша бо ищущии души отрочате.

²¹Он же востав, поят отроча и Матерь его и прииде в землю израилеву.

²²Слышав же, яко архелай царствует во иудеи вместо ирода отца своего, убояся тамо ити: весть же приемь во сне, отиде в пределы галилейския

²³и пришед вселися во граде нарицаемем назарет: яко да сбудется реченное пророки, яко назорей наречется.