Watu wanaungama dhambi zao

¹Siku ya ishirini na nne ya mwezi huo wa saba, watu wa Israeli walikusanyika, wakifunga na kuvaa mavazi ya magunia na kujipaka udongo kichwani kuonesha majuto yao.

²Wakati huo, walikuwa wamejitenga mbali na watu wa mataifa mengine, wakasimama na kuungama dhambi zao na maovu ya babu zao.

³Kwa muda wa kama masaa matatu, walisimama huku sheria ya Mwenyezi-Mungu, Mungu wao, inasomwa. Na kwa masaa matatu yaliyofuata, walikuwa wakitubu na kumwabudu Mwenyezi-Mungu, Mungu wao.

⁴Kuliwekwa jukwaa la Walawi; hapo walisimama Yeshua, Bani, Kadmieli, Shebania, Buni, Sherebia, Bani na Kenani. Wakamwomba kwa sauti kubwa Mwenyezi-Mungu, Mungu wao.

⁵Walawi, yaani: Yeshua, Kadmieli, Bani, Hashabuea, Sherebia, Hodia, Shebania na Pethahia wakawaambia watu;

“Simameni na kumsifu Mwenyezi-Mungu, Mungu wenu.

Msifuni milele na milele!

Na watu walisifu jina lako tukufu,

ambalo hutukuka kuliko baraka na sifa zote.”

Sala ya toba

⁶Ezra akaomba kwa sala ifuatayo:

“Wewe peke yako ndiwe Mwenyezi-Mungu;

ndiwe uliyefanya mbingu na jeshi lake lote,

dunia na vyote vilivyomo,

bahari na vyote vilivyomo;

nawe ndiwe unayevihifadhi hai,

na jeshi lote la mbinguni lakuabudu wewe.

⁷Wewe ndiwe Mwenyezi-Mungu,

Mungu uliyemchagua Abramu,

ukamtoa toka Uri ya Wakaldayo

na kumpa jina Abrahamu.

⁸Ukamwona kuwa yu mwadilifu mbele yako;

ukafanya agano naye kuwapa wazawa wake nchi ya Wakanaani,

Wahiti, Waamori, Waperizi, Wayebusi na Wagirgashi.

Na ahadi yako ukaitimiza;

kwani wewe u mwaminifu.

⁹“Uliyaona mateso ya babu zetu

walipokuwa nchini Misri,

na walipokuomba msaada kwenye Bahari ya Shamu

uliwasikia.

¹⁰Ulifanya ishara na maajabu dhidi ya Farao,

watumishi wake wote

na watu wote wa nchi yake;

kwani ulijua kuwa

waliwakandamiza babu zetu.

Ukajipatia umaarufu uliopo mpaka leo.

¹¹Uliigawa bahari katikati mbele yao,

nao wakapita katikati ya bahari,

mahali pakavu.

Lakini ukawatupa Wamisri waliowafuatia

kama jiwe zito ndani ya maji mengi.

¹²Mchana uliwaongoza kwa mnara wa wingu,

na usiku uliwaongoza kwa mnara wa moto

ili kuwamulikia njia ya kuendea.

¹³Kule mlimani Sinai

ulishuka toka mbinguni na kuzungumza nao.

Ukawapa maagizo safi, sheria za kweli,

kanuni nzuri na amri.

¹⁴Kwa njia ya Mose, mtumishi wako,

ukawajulisha Sabato yako takatifu

na ukawaagiza kuzifuata amri,

kanuni na sheria ulizowaamrisha.

¹⁵Walipokuwa na njaa,

ukawapa chakula kutoka mbinguni.

Walipokuwa na kiu

ukawapa maji kutoka kwenye mwamba.

Ukawaagiza kuichukua nchi uliyokuwa umewaahidi.

¹⁶Lakini wao na babu zetu wakawa na kiburi

na wakawa na shingo ngumu

wakakataa kufuata maagizo yako.

¹⁷Wakakataa kutii;

wasiyakumbuke maajabu uliyofanya miongoni mwao.

Wakawa na shingo zao ngumu,

wakajichagulia kiongozi wa kuwarudisha

utumwani nchini Misri.

Bali wewe Mungu u mwepesi kusamehe,

mwenye neema na huruma,

wewe hukasiriki upesi.

U mwenye fadhili nyingi, na hukuwatupa.

¹⁸Hata walipojitengenezea sanamu ya ndama na kusema,

‘Huyu ndiye mungu wetu

aliyetutoa kutoka nchi ya Misri,’

wakawa wamefanya kufuru kubwa.

¹⁹Wewe kwa huruma zako nyingi

hukuwatupa kule jangwani.

Mnara wa wingu

uliowaongoza mchana haukuondoka,

wala mnara wa moto

uliowamulikia njia usiku, haukuondoka.

²⁰Ukawapa roho yako njema kuwashauri;

ukawapa mana kuwa chakula chao na maji ya kunywa

ili kutuliza kiu chao.

²¹Ukawatunza jangwani kwa miaka arubaini

na hawakukosa chochote;

mavazi yao hayakuchakaa

wala nyayo zao hazikuvimba.

²²“Ukawaruhusu kushinda falme na mataifa,

ukawafanyia mengi kila upande.

Wakaishinda nchi ya Heshboni

alikotawala mfalme Sihoni;

na tena wakaishinda nchi ya Bashani

alikotawala mfalme Ogu.

²³Wazawa wao ukawafanya wawe wengi

kama nyota za mbinguni;

ukawaleta katika nchi

uliyowaahidi babu zao.

²⁴Hivyo, hao wazawa wakaja na kuimiliki nchi;

uliwashinda wakazi wa nchi hiyo,

Wakanaani, ukawatia mikononi mwao,

pamoja na wafalme wao,

watu wao na nchi yao ili wawatende wapendavyo.

²⁵Miji yenye ngome wakaiteka,

wakachukua nchi yenye utajiri,

majumba yenye vitu vingi vizuri,

visima vilivyochimbwa,

mashamba ya mizabibu na mizeituni

pamoja na miti yenye matunda kwa wingi.

Hivyo wakala,

wakashiba na kunenepa

na kuufurahia wema wako.

²⁶Lakini hawakuwa waaminifu kwako.

Wakakuasi,

wakaiacha sheria yako

na kuwaua manabii waliowaonya

ili wakurudie wewe.

Wakakufuru sana.

²⁷Hivyo, ukawatia katika mikono ya adui zao,

nao wakawatesa.

Lakini wakiwa katika mateso yao,

wakakulilia, nawe ukawasikia kutoka mbinguni.

Na kwa huruma zako nyingi,

ukawapelekea viongozi wa kuwaokoa;

nao wakawakomboa toka mikononi mwao.

²⁸Lakini amani ilipopatikana

wakatenda dhambi tena mbele yako,

nawe ukawaacha watiwe katika

mikono ya adui zao wawatawale.

Hata hivyo, walipotubu na kukulilia

ukawasikiliza kutoka mbinguni.

Na kwa kulingana na huruma zako nyingi,

ukawaokoa mara nyingi.

²⁹Ukawaonya ili wairudie sheria yako.

Hata hivyo, kwa kiburi chao,

wakaacha kuzitii amri zako.

Wakayaasi maagizo yako,

ambayo kwayo mtu akiyatii, ataishi.

Wakawa wajeuri

pia wakafanya shingo zao ngumu,

na wakakataa kuwa watiifu.

³⁰Ukawavumilia kwa miaka mingi,

na kuwaonya kwa njia ya roho yako

kwa kupitia manabii wako;

hata hivyo hawakusikiliza.

Basi ukawaacha

ukawatia mikononi mwa mataifa mengine.

³¹Hata hivyo,

kutokana na huruma zako nyingi,

hukuwaacha waangamie kabisa au kuwatupa,

kwani wewe u Mungu mwenye neema

na huruma.

³²Kwa hiyo, ee Mungu wetu,

Mungu Mkuu,

mwenye nguvu na wa kutisha,

wewe unalishika agano lako

na una fadhili nyingi.

Mateso yaliyotupata, sisi,

wafalme wetu, wakuu wetu,

makuhani wetu, manabii wetu,

babu zetu na watu wako wote

tangu wakati wa wafalme wa Ashuru mpaka leo,

usiyaone kuwa ni madogo.

³³Hata hivyo,

unayo haki kwa kutuadhibu hivyo;

kwani wewe umekuwa mwaminifu

ambapo sisi tumekuwa watenda maovu.

³⁴Wafalme wetu, wakuu wetu,

makuhani wetu na babu zetu

hawajaishika sheria yako

wala kujali amri yako

na maonyo yako uliyowapa.

³⁵Hawakukutumikia katika ufalme wao,

wala walipoyafurahia mema yako mengi uliyowajalia kwa wingi,

katika nchi kubwa na yenye rutuba uliyowapa

hawakuyaacha matendo yao maovu.

³⁶Na leo tumekuwa watumwa;

tu watumwa katika nchi uliyowapa babu zetu

wafurahie matunda na vipawa vyake vyema.

³⁷Kwa sababu ya dhambi zetu,

utajiri wa nchi hii

unawaendea wafalme uliowaleta kututawala.

Wanatutawala wapendavyo

hata na mifugo yetu

wanaitendea wapendavyo,

tumo katika dhiki kuu.”

Watu wanatia sahihi mapatano

³⁸Kutokana na haya yote yaliyotokea, sisi tunaweka agano imara na wakuu wetu kwa maandishi; Walawi na makuhani wanatia sahihi zao na mhuri wao.[#9:38]