Sauti ya Mungu katika dhoruba

¹Mpeni Mwenyezi-Mungu heshima enyi viumbe vya mbinguni,[#Taz Zab 96:7-9]

semeni Mwenyezi-Mungu ni mtukufu na mwenye nguvu.

²Semeni jina la Mwenyezi-Mungu ni tukufu.

Mwabuduni katika mahali pake patakatifu.

³Sauti ya Mwenyezi-Mungu yasikika juu ya maji;

Mungu mtukufu angurumisha radi,

sauti ya Mwenyezi-Mungu yasikika juu ya bahari!

⁴Sauti ya Mwenyezi-Mungu ina nguvu,

sauti ya Mwenyezi-Mungu imejaa fahari.

⁵Sauti ya Mwenyezi-Mungu huvunja mierezi;

Mwenyezi-Mungu avunja mierezi ya Lebanoni.

⁶Huirusha milima ya Lebanoni kama ndama,

milima ya Sirioni kama mwananyati.

⁷Sauti ya Mwenyezi-Mungu hutoa miali ya moto.

⁸Sauti ya Mwenyezi-Mungu hutetemesha jangwa,

Mwenyezi-Mungu hutetemesha jangwa la Kadeshi.

⁹Sauti ya Mwenyezi-Mungu huitikisa mivule,[#29:9 Kiebrania: Humfanya paa azae.]

hukwanyua majani ya miti msituni,

na hekaluni mwake wote wasema:

“Utukufu kwa Mungu!”

¹⁰Mwenyezi-Mungu ameketi juu ya gharika;

Mwenyezi-Mungu ni mfalme atawalaye milele.

¹¹Mwenyezi-Mungu na awape watu wake nguvu!

Mwenyezi-Mungu na awabariki watu wake kwa amani!