Uovu wa watu

¹Wapumbavu hujisemea moyoni:[#14:1 Neno la Kiebrania lililotafsiriwa hapa kama “mpumbavu” katika mazingira haya linamtaja mtu ambaye kimsingi ni mwovu. Mpumbavu hamtegemei Mungu na hana upendo kwa watu, na hana hekima (Mhub 2:14).]

“Hakuna Mungu.”

Wote wamepotoka kabisa,

wametenda mambo ya kuchukiza;

hakuna hata mmoja atendaye jema!

²Mwenyezi-Mungu anawaangalia wanadamu kutoka mbinguni,

aone kama kuna yeyote mwenye busara,

kama kuna yeyote anayemtafuta Mungu.

³Lakini wote wamekosa,

wote wamepotoka pamoja;

hakuna atendaye mema,

hakuna hata mmoja.

⁴“Je, hao watendao maovu hawana akili?

Wanawatafuna watu wangu kama mikate;

wala hawanijali mimi Mwenyezi-Mungu.”

⁵Hapo watashikwa na hofu kubwa,

maana Mungu yu pamoja na waadilifu.

⁶Unaweza kuvuruga mipango ya maskini,[#14:6 Taz 9:8-9 na 12:5 maelezo.]

lakini Mwenyezi-Mungu ndiye kimbilio lake.

⁷Laiti ukombozi wa Israeli ungefika kutoka Siyoni!

Mwenyezi-Mungu atakaporekebisha hali ya watu wake,

wazawa wa Yakobo watashangilia;

Waisraeli watafurahi.