Kuomba usalama

¹Unilinde ee Mungu;

maana kwako nakimbilia usalama.

²Namwambia Mungu: “Wewe u Bwana wangu;

sina jema lolote ila wewe.”

³Ni bora sana hao watakatifu walioko nchini,

kukaa nao ndiyo furaha yangu.

⁴Lakini wanaoabudu miungu mingine,

watapata mateso mengi.

tambiko ya damu sitaitolea kamwe,

na majina ya miungu hiyo sitayataja.

⁵Wewe ee Mwenyezi-Mungu ndiwe riziki yangu kuu,

majaliwa yangu yamo mikononi mwako.

⁶Umenipimia sehemu nzuri sana;

naam, urithi wangu ni wa kupendeza.

⁷Namsifu Mwenyezi-Mungu kwa kuniongoza,

usiku dhamiri yangu yanionya.

⁸Namweka Mwenyezi-Mungu mbele yangu daima;

yuko pamoja nami, wala sitatikisika.

⁹Kwa hiyo nitafurahi kwa moyo wote na kushangilia,

nami nitakaa salama salimini.

¹⁰Naam wewe hutaiacha nafsi yangu kuzimu,

hutaniacha mimi mwaminifu wako nipate kuoza.

¹¹Wanionesha njia ya kufikia uhai;

kuwako kwako kwanijaza furaha kamili,

katika mkono wako wa nguvu mna mema ya milele.