Kupigwa mhuri kwa watu 144,000 wa Israeli

¹Baada ya hayo nikawaona malaika wanne wamesimama katika pembe nne za dunia, wakishika pepo nne za dunia ili upepo usivume hata kidogo: wala katika nchi, wala baharini, wala kwenye miti.[#7:1 Kulingana na pande nne za dunia na kwa maana ya ulimwengu wote.; #7:1-17 Sura hii inatenga kufunguliwa mhuri wa sita na wa saba ambayo yaonesha jinsi Mungu anavyohakikisha kwamba watu wake wanaokolewa.]

²Kisha, nikamwona malaika mwingine akipanda juu kutoka mashariki, akiwa na mhuri wa Mungu aliye hai. Akapaza sauti na kuwaambia hao malaika wanne waliokabidhiwa jukumu la kuiharibu nchi na bahari,

³“Msiharibu nchi, wala bahari, wala miti, mpaka tutakapokwisha wapiga mhuri watumishi wa Mungu wetu katika paji la uso.”[#7:3 Eze 9:4-6; ling Ufu 2:17; 22:4. Hapa mhuri ni alama wanayowekewa wale walio wake Mungu ambaye anawalinda wakati wa majaribu (taz 3:10; 9:4). Ling 2Kor 1:22; Efe 1:13; 4:30.]

⁴Kisha, nikasikia idadi ya hao waliopigwa mhuri: Watu 144,000 wa makabila yote ya watu wa Israeli.[#7:4 Idadi au tarakimu 144,000 inamaanisha kwa mfano jumla ya watu wote wa Mungu. Labda hapa ni marejeo ya halaiki ile inayotajwa katika 7:9-17.]

⁵Kabila la Yuda, watu 12,000; kabila la Reubeni, 12,000; kabila la Gadi, 12,000;[#7:5-8 Orodha ya makabila kumi na mawili ya Israeli inatumika kama mfano, nayo yahitilafiana na orodha nyingine katika A.K. (Mwa 49; Eze 48). Hapa makabila ya Dani na Efraimu hayatajwi badala yake ni makabila ya Yosefu na mwanae Manase.]

⁶kabila la Asheri, 12,000; kabila la Naftali, 12,000; kabila la Manase, 12,000;

⁷kabila la Simeoni, 12,000; kabila la Lawi, 12,000; kabila la Isakari, 12,000;

⁸kabila la Zebuluni, 12,000; kabila la Yosefu, 12,000; na kabila la Benyamini, 12,000.

Umati wa watu wa kila taifa

⁹Kisha, nikatazama, nikaona umati mkubwa wa watu wasiohesabika: watu wa kila taifa, ukoo, jamaa na lugha. Nao walikuwa wamesimama mbele ya kiti cha enzi na mbele ya Mwanakondoo, wamevaa mavazi meupe na kushika matawi ya mitende mikononi mwao.[#7:9 Ishara au mfano wa ushindi (Yoh 12:13).]

¹⁰Wakapaza sauti: “Ukombozi wetu watoka kwa Mungu wetu aketiye juu ya kiti cha enzi, na kutoka kwa Mwanakondoo!”

¹¹Malaika wote wakasimama kukizunguka kiti cha enzi, wazee na wale viumbe hai wanne. Wakaanguka kifudifudi mbele ya kiti cha enzi, wakamwabudu Mungu,

¹²wakisema, “Amina! Sifa, utukufu, hekima, shukrani, heshima, uwezo na nguvu viwe kwa Mungu wetu, milele na milele! Amina!”[#7:12 Taz maelezo ya 1:6.]

¹³Mmoja wa hao wazee akaniuliza, “Hawa waliovaa mavazi meupe ni watu gani? Na wametoka wapi?”

¹⁴Nami nikamjibu, “Mheshimiwa, wewe wajua!” Naye akaniambia, “Hawa ni wale waliopita salama katika ule udhalimu mkuu. Waliyaosha mavazi yao katika damu ya Mwanakondoo, yakawa meupe kabisa.[#7:14 Dan 12:1; Mat 24:21; Marko 13:19; ling Ufu 3:10.; #7:14 Maneno yanayotumika kama mfano kutaja kutakaswa kwa hao watu kutoka dhambi ni kwa kifo cha Kristo chenye kuwakomboa watu. Ling Yoh 1:29; 1Yoh 1:7 na pia Ufu 1:5; 3:5; 6:11.]

¹⁵Ndiyo maana wako mbele ya kiti cha enzi cha Mungu. Humtumikia Mungu mchana na usiku katika hekalu lake; naye aketiye juu ya kiti cha enzi atatandaza hema lake juu yao kuwalinda.

¹⁶Hawataona tena njaa wala kiu; jua wala joto kali halitawachoma tena,[#7:16 Isa 49:10; ling Zab 121:6. Aya 16-17 zinanukua makala kadhaa kutoka A.K.]

¹⁷kwa sababu Mwanakondoo aliye katikati ya kiti cha enzi atakuwa mchungaji wao, naye atawaongoza kwenye chemchemi za maji ya uhai. Naye Mungu atayafuta machozi yote machoni mwao.”[#7:17 Kutokana na kifo chake Mwanakondoo, kifo ambacho kinawakomboa watu, huyo Mwanakondoo pia ni Mchungaji Mwema mwenye kuwaongoza kondoo, kuwalinda na kuwatawala kutoka kwenye kiti chake cha enzi (Ling Eze 34:23; Yoh 10:1-16; Ebr 13:20; 1Pet 2:25 na pia Ufu 22:1-5).; #7:17 Zab 23:1-2; Isa 49:10 ling Yoh 4:10; 7:37-38.; #7:17 Isa 25:8; Ufu 21:4.]