Waefeso 3

Mpango wa Mungu kwa watu wa Mataifa

¹Kwa sababu hii, mimi Paulo, ni mfungwa wa Kristo Yesu kwa ajili yenu ninyi watu wa Mataifa.

²Kwa hakika mmekwisha kusikia kuhusu ile huduma ya neema ya Mungu niliyopewa kwa ajili yenu,

³yaani ile siri iliodhihirishwa kwangu kupitia ufunuo, kama nilivyotangulia kuandika kwa kifupi.

⁴Kwa kusoma haya, basi mtaweza kuelewa ufahamu wangu katika siri ya Kristo.

⁵Siri hii haikudhihirishwa kwa wanadamu katika vizazi vingine kama vile sasa ilivyodhihirishwa na Roho kwa mitume na manabii watakatifu wa Mungu.

⁶Siri hii ni kwamba, kupitia kwa Injili, watu wa Mataifa ni warithi pamoja na Israeli, viungo vya mwili mmoja na washiriki pamoja wa ahadi katika Kristo Yesu.

⁷Nimekuwa mtumishi wa Injili hii kwa kipawa cha neema ya Mungu niliyopewa kwa nguvu yake itendayo kazi.

⁸Ingawa mimi ni mdogo kuliko aliye mdogo kabisa miongoni mwa watakatifu wote, nilipewa neema hii: ili niwahubirie watu wa Mataifa kuhusu utajiri usiopimika ulio ndani ya Kristo,

⁹na kuweka wazi kwa kila mtu siri hii iliyokuwa imefichwa tangu zamani katika Mungu, aliyeumba vitu vyote.

¹⁰Ili sasa kupitia kwa kanisa, hekima ya Mungu iliyo ya namna nyingi ipate kujulikana kwa watawala na wenye mamlaka katika ulimwengu wa roho,

¹¹sawasawa na kusudi lake la milele alilolitimiza katika Kristo Yesu Bwana wetu.

¹²Ndani yake na kupitia kwa imani katika yeye twaweza kumkaribia Mungu kwa uhuru na kwa ujasiri.

¹³Kwa hiyo, nawaomba msikate tamaa kwa sababu ya mateso yangu kwa ajili yenu, hayo ni utukufu wenu.

Maombi ya Paulo kwa Waefeso

¹⁴Kwa sababu hii nampigia Baba magoti,

¹⁵ambaye ubaba wote wa kila jamaa za mbinguni na za duniani unatokana naye.

¹⁶Namwomba Mungu awaimarishe kwa kuwatia nguvu mioyo yenu kupitia kwa Roho wake kwa kadiri ya utajiri wa utukufu wake,

¹⁷ili Kristo apate kukaa mioyoni mwenu kupitia kwa imani. Nami ninaomba kwamba mkiwa wenye mizizi tena imara katika msingi wa upendo,

¹⁸mwe na uwezo wa kufahamu pamoja na watakatifu wote jinsi ulivyo upana, urefu, kimo na kina upendo wa Kristo,

¹⁹na kujua upendo huu unaopita fahamu, ili mpate kujazwa na kufikia kipimo cha ukamilifu wote wa Mungu.

²⁰Basi kwa yeye awezaye kutenda mambo ya ajabu yasiyopimika kuliko yote tuyaombayo au tuyawazayo, kwa kadiri ya uweza wake ule utendao kazi ndani yetu,

²¹yeye atukuzwe katika kanisa, na katika Kristo Yesu kwa vizazi vyote, milele na milele. Amen.