Mlima wa Bwana

¹Hili ndilo aliloliona Isaya mwana wa Amozi kuhusu Yuda na Yerusalemu:

²Katika siku za mwisho

mlima wa Hekalu la Bwana utaimarishwa

kama mlima mkuu miongoni mwa milima yote,

utainuliwa juu ya vilima,

na mataifa yote yatamiminika huko.

³Mataifa mengi yatakuja na kusema,

“Njooni, twendeni kwenye mlima wa Bwana ,

kwenye nyumba ya Mungu wa Yakobo.

Atatufundisha njia zake,

ili tuweze kuenenda katika mapito yake.”

Sheria itatoka Sayuni,

neno la Bwana litatoka Yerusalemu.

⁴Atahukumu kati ya mataifa

na ataamua migogoro ya mataifa mengi.

Watafua panga zao ziwe majembe,

na mikuki yao kuwa miundu ya kukata matawi.

Taifa halitainua upanga dhidi ya taifa jingine,

wala hawatajifunza vita tena.

⁵Njooni, enyi nyumba ya Yakobo,

tutembeeni katika nuru ya Bwana .

Siku ya Bwana

⁶Bwana umewatelekeza watu wako,

nyumba ya Yakobo.

Wamejaa ushirikina unaotoka Mashariki,

wanapiga ramli kama Wafilisti

na wanashikana mikono na wapagani.

⁷Nchi yao imejaa fedha na dhahabu,

hakuna mwisho wa hazina zao.

Nchi yao imejaa farasi,

hakuna mwisho wa magari yao ya vita.

⁸Nchi yao imejaa sanamu;

wanasujudia kazi za mikono yao,

vitu vile vidole vyao vimevitengeneza.

⁹Kwa hiyo mwanadamu atashushwa

na binadamu atanyenyekezwa:

usiwasamehe.

¹⁰Ingieni kwenye miamba,

jificheni ardhini

kutokana na utisho wa Bwana

na utukufu wa enzi yake!

¹¹Macho ya mtu mwenye majivuno yatanyenyekezwa

na kiburi cha wanadamu kitashushwa,

Bwana peke yake ndiye atakayetukuzwa siku hiyo.

¹²Bwana wa majeshi anayo siku aliyoiweka akiba

kwa wote wenye kujivuna na wenye kiburi,

kwa wote wanaojikweza

(nao watanyenyekezwa),

¹³kwa mierezi yote ya Lebanoni iliyo mirefu sana,

na mialoni yote ya Bashani,

¹⁴kwa milima yote mirefu

na vilima vyote vilivyoinuka,

¹⁵kwa kila mnara ulio mrefu sana

na kila ukuta wenye ngome,

¹⁶kwa kila meli ya biashara,[#2:16 au ya Tarshishi (taz. 1Fal 10:22; 22:48; 2Nya 9:21; 20:36; Isa 60:9).]

na kila mashua ya kifahari.

¹⁷Majivuno ya mwanadamu yatashushwa,

na kiburi cha wanadamu kitanyenyekezwa,

Bwana peke yake ndiye atatukuzwa siku hiyo,

¹⁸nazo sanamu zitatoweka kabisa.

¹⁹Watu watakimbilia kwenye mapango ndani ya miamba,

na kwenye mahandaki ardhini

kutokana na utisho wa Bwana

na utukufu wa enzi yake,

ainukapo kuitikisa dunia.

²⁰Siku ile, watu watawatupia

panya na popo

sanamu zao za fedha na za dhahabu,

walizozitengeneza ili waziabudu.

²¹Watakimbilia kwenye mapango miambani

na kwenye nyufa za miamba

kutokana na utisho wa Bwana

na utukufu wa enzi yake,

ainukapo kuitikisa dunia.

²²Acheni kumtumainia mwanadamu,

ambaye hana kitu ila pumzi katika pua zake.

Yeye ana thamani gani?