Utangulizi

Neno alifanyika mwili

¹Hapo mwanzo alikuwako Neno, naye huyo Neno alikuwa pamoja na Mungu, naye Neno alikuwa Mungu.

²Tangu mwanzo huyo Neno alikuwa pamoja na Mungu.

³Vitu vyote viliumbwa kupitia kwake, na hakuna chochote kilichoumbwa ambacho kimeumbwa pasipo yeye.

⁴Ndani yake kulikuwa na uzima, nao huo uzima ulikuwa nuru ya watu.

⁵Nuru hungʼaa gizani nalo giza halikuishinda.

⁶Alikuja mtu mmoja aliyetumwa kutoka kwa Mungu, jina lake Yohana.

⁷Alikuja kama shahidi apate kuishuhudia hiyo nuru, ili kupitia kwake watu wote waweze kuamini.

⁸Yeye mwenyewe hakuwa ile nuru, bali alikuja kuishuhudia hiyo nuru.

⁹Nuru halisi inayomwangazia kila mtu ilikuwa inakuja ulimwenguni.

¹⁰Huyo Neno alikuwako ulimwenguni, na ingawa ulimwengu uliumbwa kupitia kwake, haukumtambua.

¹¹Alikuja kwa walio wake, lakini wao hawakumpokea.

¹²Bali wote waliompokea, yaani wale walioliamini jina lake, aliwapa uwezo wa kufanyika wana wa Mungu.

¹³Hawa hawakuzaliwa kwa damu, wala kwa mapenzi ya mwili au kwa mapenzi ya mtu, bali wamezaliwa kwa mapenzi ya Mungu.

¹⁴Neno alifanyika mwili, akakaa miongoni mwetu, nasi tukauona utukufu wake, utukufu kama wa Mwana pekee atokaye kwa Baba, amejaa neema na kweli.

¹⁵Yohana alishuhudia habari zake, akapaza sauti, akisema, “Huyu ndiye yule niliyewaambia kwamba, ‘Yeye ajaye baada yangu ni mkuu kuliko mimi, kwa kuwa alikuwa kabla yangu.’ ”

¹⁶Kutokana na ukamilifu wake, sisi sote tumepokea neema juu ya neema.

¹⁷Kwa kuwa sheria ilitolewa kwa mkono wa Musa, lakini neema na kweli zimekuja kupitia Yesu Kristo.

¹⁸Hakuna mtu yeyote aliyemwona Mungu wakati wowote, ila ni Mungu Mwana pekee, aliye kifuani mwa Baba, ndiye ambaye amemdhihirisha.

Huduma ya Yesu kabla ya kurudi Galilaya

Ushuhuda wa Yohana Mbatizaji

¹⁹Huu ndio ushuhuda wa Yohana wakati viongozi wa Wayahudi waliwatuma makuhani na Walawi kutoka Yerusalemu kumuuliza, “Wewe ni nani?”

²⁰Yohana alikiri waziwazi pasipo kuficha, akasema, “Mimi si Kristo.”[#1:20 maana yake Masiya , yaani Aliyetiwa mafuta.]

²¹Wakamuuliza, “Wewe ni nani, basi? Je, wewe ni Eliya?”

Yeye akajibu, “Hapana, mimi siye.”

“Je, wewe ni yule Nabii?”

Akajibu, “Hapana.”

²²Ndipo wakasema, “Basi tuambie wewe ni nani ili tupate jibu la kuwapelekea wale waliotutuma. Wewe wasemaje juu yako mwenyewe?”

²³Akawajibu kwa maneno ya nabii Isaya, akisema, “Mimi ni sauti ya mtu aliaye nyikani, ‘Yanyoosheni mapito ya Bwana.’”[#1:23 Isa 40:3]

²⁴Basi walikuwa wametumwa watu kutoka kwa Mafarisayo,

²⁵wakamuuliza, “Kama wewe si Kristo, wala si Eliya na wala si yule Nabii, kwa nini basi unabatiza?”

²⁶Yohana akawajibu, “Mimi ninabatiza kwa maji, lakini kati yenu yupo mtu msiyemjua.[#1:26 au ndani ya maji]

²⁷Yeye anakuja baada yangu, nami sistahili hata kufungua kamba za viatu vyake.”

²⁸Mambo haya yote yalitukia huko Bethania, ngʼambo ya Yordani, mahali Yohana alipokuwa akibatiza.

Mwana-Kondoo wa Mungu

²⁹Siku iliyofuata, Yohana alimwona Yesu akimjia, akasema, “Tazama, Mwana-Kondoo wa Mungu aichukuaye dhambi ya ulimwengu!

³⁰Huyu ndiye yule niliyewaambia kwamba, ‘Mtu anakuja baada yangu ambaye ni mkuu kuliko mimi, kwa kuwa alikuwa kabla yangu.’

³¹Mimi mwenyewe sikumfahamu, lakini sababu ya kuja nikibatiza kwa maji ni ili yeye apate kufunuliwa kwa Israeli.”

³²Kisha Yohana akatoa ushuhuda huu: “Nilimwona Roho akishuka kutoka mbinguni kama hua, akakaa juu yake.

³³Mimi nisingemtambua, lakini yeye aliyenituma nibatize kwa maji alikuwa ameniambia, ‘Yule mtu utakayemwona Roho akimshukia na kukaa juu yake, huyo ndiye atakayebatiza kwa Roho Mtakatifu.’

³⁴Mimi mwenyewe nimeona jambo hili na ninashuhudia kuwa huyu ndiye Mwana wa Mungu.”

Wanafunzi wa kwanza wa Yesu

³⁵Siku iliyofuata, Yohana alikuwa huko tena pamoja na wanafunzi wake wawili.

³⁶Alipomwona Yesu akipita, akasema, “Tazama, Mwana-Kondoo wa Mungu!”

³⁷Wale wanafunzi wawili walipomsikia Yohana akisema haya, wakamfuata Yesu.

³⁸Yesu akageuka, akawaona wakimfuata, akawauliza, “Mnataka nini?”

Wakamwambia, “Rabi” (maana yake “Mwalimu”), “unaishi wapi?”

³⁹Yesu akawajibu, “Njooni, nanyi mtapaona!”

Hivyo wakaenda na kupaona mahali alipokuwa anaishi, wakakaa naye siku ile, kwa kuwa ilikuwa yapata saa kumi.

⁴⁰Andrea, nduguye Simoni Petro, alikuwa mmoja wa wale wawili waliosikia yale Yohana alisema na kumfuata Yesu.

⁴¹Kitu cha kwanza Andrea alichofanya ni kumtafuta Simoni nduguye na kumwambia, “Tumemwona Masiya” (yaani Kristo).

⁴²Naye akamleta kwa Yesu.

Yesu akamwangalia na kusema, “Wewe ni Simoni mwana wa Yohana. Utaitwa Kefa” (ambalo limetafsiriwa Petro).

⁴³Siku iliyofuata Yesu aliamua kwenda Galilaya. Akamkuta Filipo, akamwambia, “Nifuate.”

⁴⁴Filipo alikuwa raia wa Bethsaida, mji walikotoka Andrea na Petro.

⁴⁵Filipo naye akamkuta Nathanaeli na kumwambia, “Tumemwona yeye ambaye Musa aliandika habari zake katika Sheria, na ambaye pia manabii waliandika kumhusu, yaani Yesu wa Nazareti, mwana wa Yusufu.”

⁴⁶Nathanaeli akauliza, “Nazareti! Je, kitu chochote chema chaweza kutoka Nazareti?”

Filipo akamwambia, “Njoo uone.”

⁴⁷Yesu alipomwona Nathanaeli anakaribia, akanena habari zake, akasema, “Tazama huyu ni Mwisraeli kweli kweli; hana hila ndani yake.”

⁴⁸Nathanaeli akamuuliza, “Umenifahamuje?”

Yesu akamjibu, “Nilikuona ulipokuwa bado uko chini ya mtini, kabla hata Filipo hajakuita.”

⁴⁹Nathanaeli akamwambia, “Rabi, wewe ni Mwana wa Mungu! Wewe ni Mfalme wa Israeli!”

⁵⁰Yesu akamwambia, “Unaamini kwa kuwa nilikuambia nilikuona ulipokuwa bado uko chini ya mtini? Basi utaona mambo makuu kuliko hilo.”

⁵¹Ndipo akawaambia, “Amin, amin nawaambia, ninyi mtaona mbingu ikifunguka na malaika wa Mungu wakipanda na kushuka juu ya Mwana wa Adamu.”