Zaburi 108

Kuomba msaada dhidi ya adui

¹Ee Mungu, moyo wangu ni thabiti;

nitaimba na kusifu kwa moyo wangu wote.

²Amka, kinubi na zeze!

Nitayaamsha mapambazuko.

³Nitakusifu wewe, Ee Mwenyezi Mungu, kati ya mataifa;

nitaimba habari zako, katika jamaa za watu.

⁴Kwa maana upendo wako ni mkuu, ni juu kuliko mbingu;

uaminifu wako unazifikia anga.

⁵Ee Mungu, utukuzwe juu ya mbingu,

utukufu wako na uenee duniani kote.

⁶Tuokoe na utusaidie kwa mkono wako wa kuume,

ili wale unaowapenda wapate kuokolewa.

⁷Mungu amenena kutoka patakatifu pake:

“Nitaigawa Shekemu kwa ushindi

na kulipima Bonde la Sukothi.

⁸Gileadi ni yangu, na Manase ni yangu;

Efraimu ni chapeo yangu,

nayo Yuda ni fimbo yangu ya utawala.

⁹Moabu ni sinia langu la kunawia,

juu ya Edomu natupa kiatu changu;

nashangilia kwa kushindwa kwa Ufilisti.”

¹⁰Ni nani atakayenipeleka hadi mji wenye ngome?

Ni nani atakayeniongoza hadi nifike Edomu?

¹¹Ee Mungu, si ni wewe uliyetukataa sisi,

na hutoki tena na majeshi yetu?

¹²Tuletee msaada dhidi ya adui,

kwa maana msaada wa mwanadamu haufai kitu.

¹³Kwa msaada wa Mungu tutapata ushindi,

naye atawaponda adui zetu.