Zaburi 149

Wimbo wa kumsifu Mwenyezi Mungu kwa wema wake

¹Msifuni Mwenyezi Mungu.[#149:1 kwa Kiebrania ni Hallelu Yah ; pia 149:9.]

Mwimbieni Mwenyezi Mungu wimbo mpya,

sifa zake katika kusanyiko la watakatifu.

²Israeli na washangilie katika Muumba wao,

watu wa Sayuni na wafurahi katika Mfalme wao.

³Na walisifu jina lake kwa kucheza

na wampigie muziki kwa matari na kinubi.

⁴Kwa maana Mwenyezi Mungu anapendezwa na watu wake,

anawavika wanyenyekevu taji la wokovu.

⁵Watakatifu washangilie katika heshima hii,

na waimbe kwa shangwe vitandani mwao.

⁶Sifa za Mungu na ziwe vinywani mwao

na upanga ukatao kuwili mikononi mwao,

⁷ili walipize mataifa kisasi

na adhabu juu ya mataifa,

⁸wawafunge wafalme wao kwa minyororo,

wakuu wao kwa pingu za chuma,

⁹ili kuwafanyia hukumu iliyoandikwa dhidi yao.

Huu ndio utukufu wa watakatifu wake wote.

Msifuni Mwenyezi Mungu.