Zaburi 16

Sala ya matumaini

¹Ee Mungu, uniweke salama,

kwa maana kwako nimekimbilia.

²Nilimwambia Bwana , “Wewe ndiwe Bwana wangu;

pasipo wewe sina jambo jema.”

³Kuhusu watakatifu walio duniani,

hao ndio wenye fahari,

na ninapendezwa nao.

⁴Huzuni itaongezeka kwa wale

wanaokimbilia miungu mingine.

Sitazimimina sadaka za damu kwa miungu kama hiyo,

au kutaja majina yao mdomoni mwangu.

⁵Bwana umeniwekea fungu langu na kikombe changu;

umeyafanya mambo yangu yote yawe salama.

⁶Alama za mipaka zimeniangukia mahali pazuri,

hakika nimepata urithi mzuri.

⁷Nitamsifu Bwana ambaye hunishauri,

hata wakati wa usiku moyo wangu hunifundisha.

⁸Nimemweka Bwana mbele yangu daima.

Kwa sababu yuko mkono wangu wa kuume,

sitatikisika.

⁹Kwa hiyo moyo wangu unafurahia,

na ulimi wangu unashangilia;

mwili wangu nao

utapumzika salama,

¹⁰kwa maana hutaniacha Kuzimu,[#16:10 Kuzimu kwa Kiebrania ni Sheol , yaani Shimo lisilo na mwisho.]

wala hutamwacha Mtakatifu Wako

kuona uharibifu.

¹¹Umenijulisha njia ya uzima;

utanijaza na furaha mbele zako,

pamoja na furaha ya milele

katika mkono wako wa kuume.