Zaburi 59

Kuomba ulinzi wa Mungu

¹Ee Mungu, uniokoe na adui zangu,

unilinde kutokana na hao wanaoinuka dhidi yangu.

²Uniponye na watu watendao maovu,

uniokoe kutokana na wanaomwaga damu.

³Tazama wanavyonivizia!

Watu wakali wananifanyia hila,

ingawa Ee Bwana , mimi sijakosea

wala kutenda dhambi.

⁴Sijatenda kosa; hata hivyo wako tayari kunishambulia.

Inuka unisaidie, uone hali yangu mbaya!

⁵Ee Mungu, Bwana wa majeshi,

uliye Mungu wa Israeli,

zinduka uyaadhibu mataifa yote;

usioneshe huruma kwa wasaliti waovu.

⁶Hurudi wakati wa jioni,

wakibweka kama mbwa,

wakiuzurura mji.

⁷Tazama yale wanayotema kutoka vinywa vyao,

hutema panga kutoka midomo yao,

nao husema, “Ni nani atakayetusikia?”

⁸Lakini wewe, Bwana , uwacheke;

unayadharau mataifa hayo yote.

⁹Ee nguvu yangu, ninakutazama wewe,

wewe, Ee Mungu, ndiwe ngome yangu,

¹⁰Mungu wangu unayenipenda.

Mungu atanitangulia,

naye atanifanya niwachekelee

wale wanaonisingizia.

¹¹Lakini usiwaue, Ee Bwana, ngao yetu,

au sivyo watu wangu watasahau.

Katika uwezo wako wafanye watangetange

na uwashushe chini.

¹²Kwa ajili ya dhambi za vinywa vyao,

kwa ajili ya maneno ya midomo yao,

waache wanaswe katika kiburi chao.

Kwa ajili ya laana na uongo wanaotamka,

¹³wateketeze katika ghadhabu,

wateketeze hadi wasiwepo tena.

Ndipo itakapofahamika katika miisho ya dunia

kwamba Mungu anatawala katika Yakobo.

¹⁴Hurudi jioni,

wakibweka kama mbwa,

wakiuzurura mji.

¹⁵Wanatangatanga wakitafuta chakula,

wasipotosheka hubweka kama mbwa.

¹⁶Lakini mimi nitaziimba nguvu zako,

asubuhi nitaimba kuhusu upendo wako;

kwa maana wewe ndiwe ngome yangu

na kimbilio langu wakati wa shida.

¹⁷Ee uliye Nguvu zangu, ninakuimbia sifa.

Wewe, Ee Mungu, ndiwe ngome yangu,

Mungu unayenipenda.