Zaburi 63

Shauku kwa ajili ya uwepo wa Mungu

¹Ee Mungu, wewe ni Mungu wangu,

nakutafuta kwa moyo wote;

nafsi yangu inakuonea kiu,

mwili wangu unakuonea wewe shauku,

katika nchi kame na iliyochoka,

mahali pasipo maji.

²Nimekuona katika mahali patakatifu

na kuuona uwezo wako na utukufu wako.

³Kwa sababu upendo wako ni bora kuliko uhai,

midomo yangu itakuadhimisha.

⁴Nitakusifu siku zote za maisha yangu,

na kwa jina lako nitainua mikono yangu.

⁵Nafsi yangu itatoshelezwa,

kama kushiba vyakula vizuri;

kwa midomo iimbayo

kinywa changu kitakusifu wewe.

⁶Kitandani mwangu ninakukumbuka wewe;

ninakuwaza makesha yote ya usiku.

⁷Kwa sababu wewe ndiwe msaada wangu,

chini ya uvuli wa mabawa yako naimba.

⁸Nafsi yangu inaambatana nawe,

mkono wako wa kuume hunishika.

⁹Wale wanaotafuta uhai wangu wataangamizwa;

wataenda chini kwenye vilindi vya dunia.

¹⁰Watatolewa wafe kwa upanga,

nao watakuwa chakula cha mbweha.

¹¹Bali mfalme atafurahi katika Mungu,

wale wote waapao kwa jina la Mungu watamsifu,

bali vinywa vya waongo vitanyamazishwa.