Zaburi 82

Maombi kwa ajili ya kutaka haki

¹Mungu anaongoza kusanyiko kuu,

anatoa hukumu miongoni mwa “miungu”:

²“Hata lini utaendelea kuwatetea wasio haki

na kuonesha upendeleo kwa waovu?

³Teteeni wanyonge na yatima,

tunzeni haki za maskini na waliodhulumiwa.

⁴Mwokoeni mnyonge na mhitaji,

wakomboeni kutoka mkononi mwa mwovu.

⁵“Hawajui lolote, hawaelewi lolote.

Wanatembea gizani;

misingi yote ya dunia imetikisika.

⁶“Nilisema, ‘Ninyi ni “miungu”;

ninyi nyote ni wana wa Aliye Juu Sana.’

⁷Lakini mtakufa kama wanadamu wa kawaida;

mtaanguka kama mtawala mwingine yeyote.”

⁸Ee Mungu, inuka uihukumu nchi,

kwa kuwa mataifa yote ni urithi wako.