Zaburi 88

Kilio kwa ajili ya kuomba msaada

¹Ee Bwana , Mungu uniokoaye,

nimelia mbele zako usiku na mchana.

²Maombi yangu yafike mbele zako,

utegee kilio changu sikio lako.

³Kwa maana nafsi yangu imejaa taabu,

na maisha yangu yanakaribia kaburi.

⁴Nimehesabiwa miongoni mwa wale wanaoshuka shimoni;

niko kama mtu asiye na nguvu.

⁵Nimetengwa pamoja na wafu,

kama waliochinjwa walalao kaburini,

ambao huwakumbuki tena,

ambao wamekatiliwa mbali na uangalizi wako.

⁶Umenitupa katika shimo lenye kina kirefu sana,

katika vina vya giza nene.

⁷Ghadhabu yako imekuwa nzito juu yangu,

umenigharikisha kwa mawimbi yako yote.

⁸Umenitenga na rafiki zangu wa karibu

na kunifanya chukizo kwao.

Nimezuiliwa, wala siwezi kutoroka;

⁹nuru ya macho yangu

imefifia kwa ajili ya huzuni.

Ee Bwana , ninakuita kila siku,

ninakunyooshea wewe mikono yangu.

¹⁰Je, wewe huwaonesha wafu maajabu yako?

Je, wale waliokufa huinuka na kukusifu?

¹¹Je, upendo wako hutangazwa kaburini,

uaminifu wako katika Uharibifu?

¹²Je, maajabu yako hujulikana mahali pa giza,

au matendo yako ya haki katika nchi ya usahaulifu?

¹³Lakini ninakulilia wewe, Ee Bwana , unisaidie;

asubuhi maombi yangu huja mbele zako.

¹⁴Ee Bwana , kwa nini unanikataa

na kunificha uso wako?

¹⁵Tangu ujana wangu nimeteseka, nikakaribia kifo;

nimepatwa na mapigo yako, nami nimekata tamaa.

¹⁶Ghadhabu yako imepita juu yangu;

mapigo yako yameniangamiza.

¹⁷Mchana kutwa zinanizunguka kama mafuriko;

zimenimeza kabisa.

¹⁸Umeniondolea rafiki na wapendwa wangu;

giza limekuwa rafiki yangu wa karibu kuliko wote.