Zaburi 9

Shukrani kwa Mungu kwa ajili ya haki yake

¹Ee Bwana , nitakutukuza kwa moyo wangu wote,

nitayasimulia matendo yako yote ya ajabu.

²Nitafurahi na kushangilia ndani yako.

Nitaliimbia sifa jina lako, Ewe Uliye Juu Sana.

³Adui zangu wamerudi nyuma,

wamejikwaa na kuangamia mbele zako.

⁴Kwa maana umetetea haki yangu na msimamo wangu;

umeketi kwenye kiti chako cha enzi,

ukihukumu kwa haki.

⁵Umekemea mataifa na kuwaangamiza waovu;

umeyafuta majina yao milele na milele.

⁶Uharibifu usiokoma umempata adui,

umeingʼoa miji yao;

hata kumbukumbu lao limetoweka.

⁷Bwana anatawala milele,

ameweka kiti chake cha enzi apate kuhukumu.

⁸Mungu atahukumu ulimwengu kwa haki,

atatawala mataifa kwa haki.

⁹Bwana ni kimbilio la wanaodhulumiwa,

ni ngome imara wakati wa shida.

¹⁰Wote wanaolijua jina lako watakutumaini wewe,

kwa maana wewe Bwana ,

hujawaacha kamwe wanaokutafuta.

¹¹Mwimbieni Bwana sifa, amefanywa mtawala Sayuni,

tangazeni miongoni mwa mataifa, yale aliyoyatenda.

¹²Kwa maana yeye anayelipiza kisasi cha damu hukumbuka,

hapuuzi kilio cha wanaoonewa.

¹³Ee Bwana , tazama jinsi walivyo wengi

adui zangu wanaonitesa!

Nihurumie, uniinue kutoka malango ya mauti,

¹⁴ili niweze kutangaza sifa zako

katika malango ya Binti Sayuni,

na huko niushangilie wokovu wako.

¹⁵Mataifa wameanguka kwenye shimo walilolichimba,

miguu yao imenaswa kwenye wavu waliouficha.

¹⁶Bwana anajulikana kwa haki yake,

waovu wamenaswa katika kazi za mikono yao.

¹⁷Waovu wataishia Kuzimu,[#9:17 Kuzimu kwa Kiebrania ni Sheol , yaani Shimo lisilo na mwisho.]

naam, mataifa yote wanaomsahau Mungu.

¹⁸Lakini mhitaji hatasahaulika siku zote,

wala matumaini ya walioonewa hayatapotea.

¹⁹Ee Bwana , inuka, usimwache binadamu ashinde.

Mataifa na yahukumiwe mbele zako.

²⁰Ee Bwana , wapige kwa hofu,

mataifa na yajue kuwa wao ni watu tu.